POT.HK：每家公司，總有一些奇怪的同事，適應，找出回應之道，才是生存的法則。
作者：廣告界袋底泥
街上有怪叔，公司有怪同事。公司分開幾team，總會有d team係特別無交流，但其實都係一件好事嚟，同每個人都咁熟只會係搞着自己，一朝早返到公司都要好似英女皇出巡咁保持微笑同揮手，但其實我只係想嗱嗱聲沖完杯咖啡返埋位開我個開心農場出嚟過隔離偷人番薯。
阿達就唔同呢，一入到公司，一副韓星訪港咁款除低副太陽眼鏡，用半咸淡嘅偽abc腔講 「骨磨擰 guys」，發覺無乜人理佢，就好似西部牛仔咁fing住個八達通套返埋自己位，再一邊發出罐頭笑聲一邊突入我地嘅話題「啊哼哼哼哼我今朝都有去check out 麥記個minions公仔，你地要唔要睇吓」。
手就一面順住女同事背脊掃落去，女同事俾佢嚇到即刻閃開，魚躍式咁仆出自己張櫈外，比較直接嘅同事冷淡咁回佢一句「我地都有換」「啊哼哼哼哼係咩」見大家反應冷淡阿達面懵懵都咁走返埋位。
死心不息嘅阿達為咗表現自己嘅男子氣慨，埋到位就即刻拖咗佢全team最弱雞嘅intern出嚟，拖人地埋個女同事位度開始拗手瓜。其實本身佢就算要拗jer瓜都唔關我事，但係佢一邊拗就一邊發出便秘嘅聲，仲要鬼鏈咁嘈嗌到全公司都聽到佢嘅腸胃問題，聽到我屁眼都有d赤赤地。
下午入pantry洗杯準備收工，見到阿達同佢班親信係度玩緊，十幾個大漢圍埋飲jolly shandy，達人見有幾個女同事步入pantry，即刻就企起身表現自己嘅男子氣慨「我個杯呢？唔見咗嘅？唔緊要我成罐嚟」
佢一舉手一仰頭就開始狂灌佢罐 jolly shandy，其餘嘅人都好似第一次見到地球人登陸月球咁不停鼓掌兼幫佢吶喊助威，只係佢唔知道，女同事們望都無望過佢就出返去，而佢最後連企都企唔穩，要扶住牆行返埋位執嘢走
公司裡，把妹手法層出不窮
https://www.facebook.com/pot.hk.media
