企係原地既爭取，多謝哂。（毛言地）

望一望Facebook，依頭有「東北村民於新城市商場默站抗逼遷」、果邊有「逾百港大校友留守抗議」、仲有鉛水事件全城網民鬧爆，依幾件事有乜共通點？首先係受害者都好落力企哂出黎，其次就係佢地真係得個企字。

係香港，想企出黎扮可憐係冇用的，要其它唔關事既市民同情你？佢地寧願行下街或者食串魚蛋，媒體對你既關注亦都有好大既時間性，好似港大副校長件事，你最聚集到鎂光燈就係你包圍佢同交信果一下，其它時間係到企？唔好意思，去趕下一單新聞先。梁振英政府最令筆者醒覺既一件事就係：係香港你要人怕你，你要人聽你講野，首先你要夠暴力。

咩叫暴力呢？唔係叫你趁人地開緊會既時候打佢一身，更加唔係叫你一刀切左蔣麗芸個頭落黎（雖然好多人都想佢有咁既下場），而係要比到你唔滿意果班人一個信息：你地係黎真既。諗下香港慣用既爭取模式：遊行、叫口號、到目的地、遞交請願信、影相、完。夠和平理性，但久而久之我係政府都覺得唔洗聽你講野啦。如果你細個果陣阿媽淨係會一味叫你「做功課，溫書啦」，但從來唔發脾氣、唔打人、唔熄左部電視，你會唔會乖乖地去做？政府梗係想市民和平，就好似細路永遠想就算自己做錯事，阿媽都唔打佢一樣，。而家既政府明顯漠視民意，你講佢，佢唔鍾意就唔聽。就算你七一有五百萬人上街都好，我唔覺得梁振英會因為有五百萬人出黎散步就覺得驚，佢驚既係咩？佔領囉，好似金鐘咁，當一班學生衝出馬路，梁振英之後所做既一連串行動先表演到佢驚既心情：佢驚既係市民唔再只係乖乖地企係鬧鬧完就算，而係大家明白到講係冇用依個道理之後會有佢地口中更加「激進」行為。

當一種模式唔work，好自然就要試另一種方法，有人受軟唔受硬，但好明顯有人都係唔打唔知驚。其實港大班人算叻架喇，起碼都仲識圍住人地，算係更進取既一種手段。我成日聽到人講唔一定要咁激進，實有其他方法之類，可能佢啱，可能有其他方法解決到，但好明顯再激啲就係其中一種有用既手段。做阿媽既可以語重心長講道理去教個仔又或者比時間佢等佢知錯，但如果個仔係梁振英的話，我諗都係拎支雞毛掃追住佢個屎忽黎打依種方法比較實際。

作者：毛言地（本文章由聚言時報授權提供）