搭車都要被剝削－巴士電視（明德偉杰風）

仲係中學生嘅時侯，每日都會搭巴士返學，朝早嘅巴士通常都好準時，所以只會早一兩分鐘到巴士站。巴士遲到、早到都有試過，呢種情況下架車就會好爆，之後個啲站就會上唔到人。放假我都會揀搭巴士，因為小巴成日急停，地鐵又站站停，但巴士行高速公路，又有位坐，而且沿途風光明媚，正好配上耳機嘅音樂。香港嘅巴士快捷舒適，冷氣夠凍，又冇塗鴉，相比起世界上其他城市有過之而無不及。但香港巴士上，亦有一種世界獨有嘅車內娛樂系統－巴士電視。

七點三，一條行屍走肉坐係巴士上層，帶上耳機，聽著 Bossa Nova，打算呆滯一下，補補眠。

「下一站，必瘦站」

本來柔和嘅晨早音樂被車廂喇叭傳出嘅廣告強姦－－返學係咁，放學係咁，返工放工，放假去玩都係咁。有人可能會話，搭半個鐘車啫，咪忍下囉，啲廣告夾雜嘅節目都幾得意吖，較大聲啲個音樂咪得囉。換個說法，即係強姦下啫，最多咪半個鐘，咪忍下囉，個猥瑣佬有幾個角度都幾靚仔呀，再唔係攞本《叮噹》奄著對眼，當佢係「哆啦A夢」咪得囉。無錯，的確係可以咁做嘅，或者呢個係世界上最有效嘅辦法。

但係點解要迫人睇你個電視？上市公司講利潤，搞咁大投資，裝幾千部電視，梗係為咗賣廣告啦。而家電視又無人睇，報紙又無人買，上網都用 ad block 啦，賣廣告已經越嚟越難。而家廣告扮到好似新聞或者電視節目咁，通街都係廣告。有啲廣告係必需嘅，要用黎維持免費服務，就好似免費電視，免費報紙，網站等。TVB 唔一定要你睇，頭條日報無迫你攞，Facebook 亦無法例規定你要用。當然，亦都冇人迫你搭巴士啦，你可以選擇行路，或者搭的士，但如果你又無錢，又無時間，你會選擇巴士。TVB 唔啱睇，你可以睇仆你個街亞視；頭條唔啱，可以攞都市，嫌Facebook太多廣告，可以唔用。呢啲公司都明白消費者有能力選擇另一啲服務供應商，所以為咗唔好流失讀者或用家，都會用辦法掩飾啲廣告，令佢哋唔好咁反感。但係係專營巴士嘅市場，九巴唔好坐係唔可以轉城巴嘅，因為除咗個別過海線之外，一條巴士線只得一間公司獨資經營，你根本就無得揀，巴士公司亦都深明呢一個道理，但係佢唔能夠單方面設定價格，所以唔知邊個天才諗出巴士電視呢個剝削貧苦大眾嘅辦法，開創世界先河。

搭巴士同攞免費報紙唔同，搭巴士係要比錢嘅；同睇免費電視唔同，巴士電視係唔熄得嘅。想廣告個陣轉台？唔好意思，無台你轉。情況就有如：每人屋企擺部電視，長開冇得熄，冇得轉台，仲要你比台費，唔想睇呀？得，出街啦；又或者，搭飛機淨係准搭國泰，電視長開冇得熄，冇得轉台，齋播廣告，飛台北由自可，飛紐約就和味囉。幫巴士公司睇埋睇埋咁多廣告，車冇得免費搭不特止，仲三不五時加車費，點講都講唔通啦。

如果大家有留意的話，係巴士部電視度一直貼住「嚴禁毀壞」嘅標語。其實，巴士上有唔少警告標語，大概都係不准飲食，不准與司機談話之類：朝早搭巴士，乘客想食早餐，貼個標語提醒下，可以理解；乘客唔識落車，想問下司機，用標語叫佢唔好，都好合理；但奇怪嘅係，張「嚴禁毀壞」嘅標語唔貼係塊玻璃度，亦都唔係貼係張凳度，而只係貼落部電視度，好明顯有一個解釋：因為有凳坐已經唔錯，點會有人仲想毀壞佢：有得坐窗邊位已經正，又點會有人要畫花個窗，但電視之所以貼著警告字句，係因為佢人人得宜誅之，內容不討好，有嘈又煩膠，令人有種想打爆佢嘅衝動。

巴士車廂電視唔應該被默許嘅原因有三個；第一，巴士嘅專營權只建基於社會嘅交通需要，並唔係一個容許巴士公司剝削乘客嘅特許證。巴士專營權令政府可以規管巴士運輸嘅收費、路線同班次，係為咗照顧到各區市民嘅交通需要，減低道路上嘅車流量，係合理嘅車費低下提供一個完善嘅交通網絡。呢種壟斷係由政府保障，大部分路線上，巴士公司並無天敵，長久嘅壟斷下，巴士公司可能覺得乘客係老馮嘅，政府亦奈佢地唔何，事實上，乘客無得揀，政府亦只可以係續專營權嘅時候發啲牙力。你可能覺得電視傷害力有限，但係聽日佢可以搵條友係車到賣翡翠，賣手信，賣美容套裝，買保險，賣開運手鏈，直情搞個直銷大會。佢可以話，啲貨好抵，出面無架，乘客有著數，但係即使係咁，呢啲同交通需要有乜春嘢關係。

第二，廣告收益無資助更低廉嘅車資，係呢個商業手法下乘客並無得益，而最慘嘅係，你嘅車費有增無減。大陸旅行團買嘢都有零團費，包食宿，仲有景點睇，你睇埋睇埋咁多廣告，換返嚟嘅係 Roadshow 發大達，你放工搭車無得訓，仲要比錢，股東仲有息派添。亞視我都講得出《我和殭屍有個約會》，《百萬富翁》，但係 Roadshow 我淨係諗到「下一站必瘦站」，同埋啲不知所謂嘅記者招待會。你睇：一個就快冇電視牌要死，另一個從來都無牌電視牌卻係度賺大錢。

第三，巴士電視內容不受監管，令低質素嘅廣告同節目氾濫，稱唔上一個正當嘅娛樂。如果你係巴士電視上睇到啲不盡不實嘅節目，或者個啲節目跟本就唔適合兒童觀看，你可以點做？打去通訊局度投訴，定係「俾多啲指導佢哋，一齊分享睇電視嘅樂趣」？第一，通訊局唔管巴士嘅，第二，你唔通日日陪佢搭巴士？巴士上乜人都有，老中青幼，各國男女，祖籍遍佈大江南北，但係部電視就只係得粵語廣告。對一啲人可能係娛樂，但係對其他就係折磨。免費電視都要有英文台，唔同時段播唔同節目，巴士電視全天候播廣告。睇到亞視你都會講「仆你個街亞視嚟嘅」，但係巴士電視呢？如果係巴士播亞視咁又點呢？巴士電視每日嘅觀眾一定多過亞視，但係就冇王管，亞視都會被通訊局罰錢，但係巴士電視呢？亞視可以轉台呢都要屌佢，唔啱睇最多唔睇啫，但係焗著睇嘅又有邊個插。

其實，呢種無孔不入嘅廣告，係唔少未來科幻片都有預言過，理論上應該無人中意，但可惜現代生活卻離不開廣告，好快，城市就會被廣告淹沒，可以阻止嘅真係唔多。只不過，係巴士電視上嘅廣告係可以被收皮嘅，專營巴士係政府特許嘅壟斷，解鈴還需繫鈴人，只要係專營權嘅條款中禁止巴士電視同禁止剝削乘客，巴士公司就唔可以再咁猖狂。搭得巴士，大部分都係非富不貴，返工、返學嘅攰，放工、放學嘅仲攰，無求甚麼，只求一片寧靜，平淡到達下個車站，為何仲要受到巴士電視嘅廣告折磨呢？

睇到呢度，如果你都仲係唔覺得巴士電視係用嚟剝削乘客嘅話，恭喜你，未來電影裡面嘅世界好適合你，繼續消費啦。

作者：明德偉杰風（本文章由聚言時報授權提供）