蒲寶 葉朗程

要當型男，必定要袋住「瀟灑」兩個字。內在的瀟灑，即是不拘泥於小節，絕不跟人斤斤計較，尤其是女人。要做到內在瀟灑，是深奧學問，要寫有排寫。所以這一次，我想集中說的，是較易掌握的，外在瀟灑。

外表的瀟灑，即是將「身外物」的負荷減到最低。我都有個背囊，但如果不是準備去 business trip 的話，盡量不會帶返工。孭住個袋，瀟灑指數會跌到好低。行走中環，挺胸收腹，左手插袋，右手電話，就是最瀟灑姿勢。What？右手電話？

That is right，右手電話，那是一個易學難精的動作。那個電話，不要放在你的正前方，要擺在右邊位置，好讓你的頭微微向右側，再低頭四十五度，無論是 check email 還是看新聞，都以那個姿勢看著電話。信我，型到你唔信。

如果你唔係好想像到呢個係個乜嘢姿勢，我講多少少。金鏞先生筆下，段譽學會逍遙派的「凌波微步」，獨步武林；今日我們中環人，要學瀟灑派的「劉華型步」，傲遊中環。《無間道》其中一幕，就是劉德華穿著西裝，頭微向右側，四十五度向下望著電話，一路睇電話，一路喺警察總部內的樓梯行落嚟。喺嗰一幕，佢右手揸電話，左手揸住支綠茶，你可以揸住杯咖啡代替，保證型過劉華。「吓？咁樣行路，好易趴街喎。」是的，做型男，就要付出些少代價，唔好大驚小怪，趴幾次街好平常。

當然，配合「劉華型步」，點都唔少得一部適合你嘅電話。現在市面上有太多手機選擇，所以一講到揀電話，身邊朋友總會七嘴八舌諸多意見。有啲又話呢個平台唔好，有啲又話嗰個食電量驚人，個個專家上身，讓你不知如何選擇。不過我冇呢個問題，因為我對手機嘅要求好專一，就係型，從來冇得妥協。手機冇得 compromise，其他嘢我好 flexible，例如去邊度 happy hour。

早幾天到大陸的二線城市為其中一位客戶考察某企業的真實情況，去咗兩日已經覺得好辛苦，住嘅地方號稱全市最好酒店但係都簡陋到不堪。回到香港，當然立刻約朋友到 Sevva，大大力吸番啲中環靈氣。「今日我哋約咗喺 ​Zentro 喎，仲好啦，你唔使行咁遠。」麻麻哋 ​Zentro 喎，Sevva 啦，我堅持。「唔鐘意唔好嚟囉。」寸到呢，約咗邊個？我識唔識？「有啲識有啲唔識。」男多定女多？他想了想說：「計埋你，好似五女三男。」WTF？諗諗吓，成日去 Sevva 都有啲悶，Zentro見。

五女三男呢啲陣容，一定要帶齊「蒲寶」。唔係淘寶，係蒲寶。女人有手袋，但男人，唔計最 friend 嗰兩個，則只有四個小袋：西裝的兩個裏袋和兩個褲袋。儲物量極度有限，因此要小心分配，才可以保持瀟灑，有三樣蒲寶是必需品。

第一蒲寶係 lip balm，即係類似潤唇膏。男人同女人一樣，嘴唇保持適當潤澤，先夠性感。乾掙掙，大忌，冇嚟神采，見到都唔開胃。潤唇膏味道，首選熱情果。這味道可以令你很熱情，而最重要是讓聞到的人更熱情。

第二蒲寶係薄荷糖，記住係薄荷糖，唔係香口膠。分別係，薄荷糖可以就咁吞，香口膠要搵地方吐。純粹保持口氣清新，食膠食糖都 ok，但若然是隨時準備與你的舌頭並肩作戰，香口膠實在是個豬一般的隊友，阻手阻腳，百份百負累。

第三蒲寶，當然是手機，主要功能是抄牌和自拍。反應要夠 smart，鏡頭要夠sharp，外型要夠，夠什麼？有天去到中環的 Samsung 專門店，店員向我介紹最新的 S6 Edge。「大光圈前置鏡頭，低光環境自拍都好靚。」Ok 喎，仲有呢？「如果突然之間，喺你面前有個畫面你唔想錯過，㩒兩吓 home button，個 camera 唔駛1秒就彈出嚟，史上最快。」呢個四眼仔好過癮，我忍唔住笑。

「咁邊隻色好？」先生，係唔係自己用？「係。」既然係咁，金色。「點解？」夠 draw，襯哂你。零舍喜歡坦白嘅人，差啲想同佢買兩部。說得好，手機呢啲嘢，反應要夠 smart，鏡頭要夠 sharp，外型就係要夠 draw。

走入 ​Zentro，找到朋友和其他朋友的所在位置。雖然燈光昏暗，但這燈光已非常足夠。再光啲，我會即走。見到呢班女人，我冇打算塗上潤唇膏，亦冇需要食薄荷糖，而且好想掟手機。如果唔係啱啱換咗部新嘅，可能真係已經掟咗。深深吸一口氣，川劇大師上身，立刻來個變臉，換個笑樣，行埋去打招呼。

叫完嘢飲，我在朋友的耳邊輕聲說：「早知係咁，我去 Sevva。」傻豬嚟㗎，你覺得有好嘢嘅話，我會叫埋你出嚟咩？「果然好朋友，又話五女三男，仲有一個呢？」去咗洗手間啩。正想低頭玩手機之際，第五個女生出現在面前。「Hi，點解係你嘅？」女生跟我說 。我哋見過，難怪這樣面熟，是在香港仔的某次飯局，一位入世未深的中環 OL，叫 Hazelyn，好靚女。

飲咗大約半個鐘，一位珠圓肉潤的女士提議集體自拍，用佢部手機。影完之後，Hazelyn 說：「好似唔係咁清喎。」呢度環境比較暗，影得唔清好正常。不如用我呢部影多張，我提議。之後，朋友拿著我的相機，再拍兩張。 影完之後，Hazelyn看著照片笑著說：「係清好多喎！」四眼哥哥果然信得過，部機果然影相夠Sharp兼夠Draw，但珠圓肉潤看一看照片後竟然說：「唔係喎，我部機影得好啲喎。」好易理解，珠圓肉潤話佢嗰部影得好啲，係因為佢嗰部影得冇咁清。

有啲人自拍，要唔清唔楚先過到自己嗰關。一張靚嘅 selfie，只需要兩樣嘢：第一係靚樣，第二係靚機。前者又好，後者又好，都係韓國貨，才信得過。

（本文為贊助內容）