【重慶森林買芒果】好有木瓜味的印度芒果王

朋友轉發了「新假期」重慶大廈買芒果的短片給我...嘩！好想食呀！ 不過， 原來合時令只到6月中...唔信邪！我就去搏一舖

(PS: 「新假期」都抄得幾似飲食男女㗎喎！)

一生人只去過一次重慶大廈食咖哩，已經是9年前的事，今日第二次重臨重慶，原來大得如此要緊

不過印度朋友好好人...「直入(重慶)， 第二個路口轉右」，多謝「高」人教我如何找「新德里士多」。 (但我忘了拍照)

老闆Kulbir(K星)忙於落單， 我問他還有沒有芒果賣，他掛了電話答我:「有呀！最後十五箱， 無晒啦， 要到出年3月中先再有芒果」(攪笑， 老闆卡片真的寫中文名:K星)

Alphonso 真的甜嗎？ K星說:「King of Mango喎...E家最後D芒果太熟， 你一定要擺雪櫃，如果唔係你今日一定要食晒！」(吓！ 梗係放雪櫃，點一晚啃12個芒果呀？)

原來， 我這批貨是上星期五運來香港， K星拍一拍個芒果盒:「E家差唔多有5％熟到爛， 所以我幫你揀啲好少少嘅畀你啦」(好呀！好呀！)

K星拉開雪櫃:「嗱！熟到黑嗰D，我自己要，食嗰時我切咗去嚟食，你都要快啲食， 好熟...所以我計你平啲 一箱$140」

(早知月頭就嚟啦， 我情願貴D食當造芒果， E家真係熟到同我一樣...又老又皺咁...)

(點解你廣東話咁好嘅？) K星答: 「我住咗係度25年， 所以識講， (點樣揀Alphonso ？) ， 好黃， 頭要有少少紅， (無紅就唔甜呀？)， 唔係..都甜但就唔同味」(咁...即係咩味？？)

其實， 「新德里」整間店也好香芒果味，  K星打開幫我揀時更加香上加香...於是我就懷住「食好嘢」心情即時趕回家， 開大餐

食飯枱放滿Alphonso ， 香到連在沙化上迷住「超速變形」的SY也探頭過來...我引誘他說:「係咪好想食呢？」

SY冷冷淡淡:「我都唔鍾意食芒果， 又唔係雪糕， (咁你又食芒果糯米糍？)， 都唔同， 人哋白色喎」(吓？包咗糯米咋喎...都係芒果嚟㗎...大少)

Kulbir說得對， 我出年3月中一定要再去買當造的Alphonso， 因為今次有好幾個都熟得很...

第一次食印度芒果， 原來味道有點似木瓜， 完全與食開的街市芒果味道不同，濃郁木瓜味， 但明明我正在食芒果

原來芒果最初發源於印度， 傳說是由仙女變成的， (難怪又香又甜又滑啦)，不過， 我覺得Alphonso甜味不及呂宋芒， 但我明年3月一定會再找Kulbir， 可能當造先最好食