如何結束一黨專政？（陳假）

圖片來源：長毛facebook

由於時間關係，依篇係一篇遲來嘅64文章。

我認為64係一個歷史事實，我唔會贊成抹走歷史，亦都要以歷史引以為鑑，記住共產黨做過啲咩事，有幾橫蠻殘暴，我絕對唔會反對悼念。

但係對於支聯會同一眾泛民一直高叫嘅「結束一黨專政，建設民主中國」，我就有啲野想講。

究竟點樣「結束一黨專政」呢？

歷史話俾我地知大概有兩個可能，第一個係奇跡出現，例如當年有個戈爾巴喬夫走出嚟結束蘇聯共產黨，的確當時真係好多人都好想有個戈爾巴喬夫係大陸出現，但係奇跡係64後25年都無出現過，唔通要再等落去？

第二個可能就係反抗專政，無論係和平或者武力手段。

但係支聯及一眾泛民一直否認「結束一黨專政」等同抗共，到底佢地想點「結束一黨專政」呢？諗住等待奇跡定靠每年64晚會遙距教育中共痛改前非放棄獨裁實行多黨制？ 當年中共對西藏自治反口[1]，今日又對香港自治反口，根本就係本家厲，我唔覺佢會自己改過囉。

如果係共黨專政之下又會有點嘅民主出現呢？ 依家831框架咪話你知咩叫有中国共產主義特色嘅「民主」制度囉。

如果要有真正民主，前提的確係要結束專政，要結束專政，抗爭會比等待奇跡或者遙距教育實際得多，從歷史之中要抗爭就先要當地人民有反抗之心，但係大陸嘅人係咪有對抗政權嘅醒覺呢？以下同大家分享一個小故事（真人真事）。

有次我去旅行係餐廳度同隔離枱吹水，發現原來係南京人，係兩夫婦。

男嘅知我係香港人之後就同我講：「我以前好鐘意睇香港嘅電影架，倩女幽魂、道道道、英雄本色，我全部都有睇架」。 (普通話)

我心諗，你識貨喎。點知佢跟住就同我講:「不過依家香港電影唔好睇嘅」。其實果陣我又無嬲嘅, 因為我知香港依家合拍片實在太多。

咁我就同佢講: 「依家香港成日都係拍合拍片, 合拍片依樣又唔拍得, 果樣又唔拍得咁咪唔好睇囉」 。(都係普通話)

我以為依個解釋好合理好易明喇，點知佢R晒頭咁同我講都仲有好多野可以拍，好似blablabla 咁。喂，咁你都唔明我真係無計喎。

佢見依果話題傾唔埋欄就話題一轉問我：「你地香港人係唔係好唔鐘意大陸管呢？依家大陸幾好呀」

心裏實在鬧咗一聲，我就答：「梗係唔鐘意喇，大陸根本唔明我地套野點運作，就夾梗張佢果套塞俾我地，我地會唔掂架」。(有興趣睇下點解我認為大陸夾梗張佢果套塞俾香港會唔掂嘅可以參考[2])

咁佢就更R頭唔明我講乜，之後佢老婆就打圓場同話：「佢地自由慣唔鐘意我地管架喇」。

===========================================

即係呢，大陸人經過咁多年嘅「教育」已經唔知自由係咩，而依對夫婦都只係我見過嘅例子之一，大陸就算有啲自治區嘅人都覺得經濟發展重要過佢地民族被控制，咁佢地又點會去抗爭呢？雖然大家會見到大陸周不時出現武力抗爭，但係都係因為民生或者利益受損，例如烏坎收地或者羅定起焚化爐甚至係條鐡路唔經過佢地條村，同對抗政權根本無關。佢地自己都唔去對抗咁點「結束一黨專政」呢？當然我唔排除大陸有人係有反抗之心，但係對於反抗政權嘅行動真係多年未見，唔通仲係度等佢地發圍？香港唔係要做民主先驅咩？點解要等大陸起義先呢？

既然要等大陸當地抗爭咁難，不如用過第二條路，試下由外圍開始，先讓一部分人民主起來，依部分就係已經習慣咗自由，甚至係英治時代已有類近民主體制嘅香港，而香港要得到真正民主最起碼要得到自主權，中共欽點賜與嘅“民主"根本係廢話。係香港成為真正抗爭成功藍本之後，可能會激發起當年曾經發起“保衛廣州話“嘅廣東人抗爭之心對抗中共，希望比較接近香港嘅廣東人會更易俾香港感染到抗爭精神喇。

如果到時廣東地區都係有心起義嘅，我地甚至可以給予緩手，到時可能可以逐步令大陸真係得到民主呢？共實依個方法就好似當年鄧小平嘅先讓一部分人富起來，以富起來地區帶動其他地方，當年老鄧用依條橋都算成功改革經濟，今日不如就參考依個成功例子喇。但係亦老老實實，依個方法點都好過搵香港教飛要香港繼續等落去，香港再沉淪落去我怕未到2047已經玩完，放過香港喇！

其實之前係本人面書簡評過以上論點，結果引起網友們對香港奪回主權風險熱烈討論，希望會係下一篇文章同大家作詳細討論。

[1]： //一九五一年，達賴喇嘛及西藏政府代表與中共簽署有十七條規則的《協議》。《協議》第三條表明：「西藏人民有實行民族區域自治的權利」；第七條：「尊重西藏人民的宗教信仰和風俗習慣，保護喇嘛寺廟。」但只過了數年，中共就打着「和平解放」、「反奴隸制」旗號，宣佈解放農奴，進行土地、經濟和社會方面的改革。至五九年，許多藏人不滿反抗，中共用血腥鎮壓。// http://hk.apple.nextmedia.com/news/art/20121103/18055675

[2]：

//金融業係香港經濟四大支柱(註一)之一，而香港金融業其中一個最賺錢頂目就係幫大陸企業攪上市，咁果啲公司就可以吸外資（外資包括香港資金），但係諗真啲，上海深圳都有股票市場成立多年（1990年成立），做咩唔直接叫外資投資去大陸股票市場而要「咁麻煩」經香港一輪批核審查呢？//

//講穿咗其中一大原因就係鬼佬信唔過大陸人做出黎盤數同資訊，所以大陸企業要千辛萬苦經香港審批後係香港上市，盤數打上香港個嘜頭班鬼佬先叫多返啲信心//

//點解大陸做假可以做到咁離譜？其實大陸嘅法律本來係寫得好詳細，但係就無人嚴格執法，亦欠缺監察機制，結果做成嚴重貪污風氣，官商勾結等情況。//

//反觀本來香港係三權分立，即行政、立法、司法分權進行因而能夠互相監察。//

//有人會話大陸一直都係咁發展，香港變到大陸咁咪一樣可以發展得好囉。喂，香港可以學大陸咁發展咩？香港夠大陸人工平咁去開廠咩？你肯減人工啲物價都唔肯減喇。咁依家大家都應該睇到核心價值唔只同公義有關，無咗你連個飯碗都保唔住呀！// 節錄舊作: 做咩要反對政府，最緊要經濟好咪得囉