[展覽活動] 香港玩具博物舘展覽

香港玩具博物舘現時在樂富廣場A區3樓展出中/，報稱過萬件玩具珍藏,展出的珍藏全是香港導演彭順所捐贈的，而且目前所展出的只佔總量的1/4，所以相信展方會定期更換展品。

現時所展示的，簡單可分兩大區;其一展區係一啲唔可以算新，但相對較近代既玩具，主題包括聖鬥士星矢，美少女戰士，龍珠，海賊王，變形金剛和超時空要塞等等，相信80s和90s後都好有共鳴。期間有對夫婦帶住對仔女參觀，夫婦二人沉醉於回憶的時候，姐弟二人曾有以下的一藉話:

弟:爸爸媽媽細個就係玩呢啲?
姐:無錯,所以爸爸媽媽今日來搵返佢地既回憶...!
弟:唓!玩埋啲咁鬼悶既嘢!
姐:你玩嗰啲唔悶?
弟:我玩嗰啲不知幾好玩!
姐:..........!!!

其實呢對姐弟既對話好有代表性，玩具點為之好玩，點為之唔悶?其實真係好睇個人，其實又真係好簡單，你鍾意就係好玩，你鍾意就唔悶，當中冇咩大哲理大學問。

個人覺得今次展覽既重頭戲，係另一展區既香港製造，我相信呢一區男女都啱，各位師兄可以帶埋女友或老婆來，你地都有無限話題，女仔成日玩既扮靚靚，煮飯仔...玩意，一應俱全，男仔玩既鐵皮公仔，超人大膠，運動，賽車，星戰，飛機，機械人...又係咩都有，但當中個人覺得呢批所謂香港製造既特點係:

1. 最近成日聽有啲師兄講，冇license質素冇保證，呢點我完全唔同意，呢個論點唔係絕對,，如果論點成立，咁嗰啲有license既產品應該好好質素，磁石波唔使俾人插到爆肛啦。呢幾十個展覽櫃入面，全部都冇license既，完全係香港玩具廠自行生產既;

2.玩具本身大多唔係根據原本設計，反而係香港設計師既自由二次創作,試諗:懞面超人揸電單車...不過係三輪既，經重新“改造”既大膠機械人，日本本地都搵唔到;

3.可能係當年技術問題，物料大多數係膠(甚至唔知物膠),高級一啲就用“鐵皮”;

4.玩具設計好生活化，如上所提，揸三輪車既超人，唔好笑，設計其實好貼心，因為玩家就係坐三輪車既小朋友。

5.當年香港玩具業真係好蓬勃，是次展覽品中，好多都係外銷，呢批香港製造可能係透過“水貨客”帶返香港...!

如果報導屬實，呢次展品只係彭順既1/4藏量，相信展品會有輪替既機制，好期待欣賞埋其餘既3/4珍藏品。