有時夜晚口痕想來點小食，不過屋企附近除咗超市同七仔，就可以話係「百無」。呢個時候，就只好自己的口痕自己醫，實行用盡屋企同超市買到嘅物資，整樣過癮小食俾自己做宵夜玩下。而今次要整嘅，就係用龍舌蘭酒Tequila加個牛油蛋糕做一度小食！（點解要用酒？筆者屋企乜都無，就係酒多。唔用呢樣唔通要落豉油？）

材料及工具：
牛油蛋糕，數量隨意。筆者用嘅係嘉頓細包裝嘅小牛蛋，但再硬身小小，如莎莉蛋糕會更好。

龍舌蘭酒，夠你浸晒啲蛋糕就得。酒方面完全我個人喜好，大家其實可以用咖啡或其他酒都得。

炸鍋一個，最好深小小，因為蛋糕本身有返咁上下大細，唔夠深好難炸得晒。

油，除非你發明到可以用水來炸野食嘅技術。

廚房紙，吸油用。

步驟：

1.首先將蛋糕切成細塊，例如筆者用嘅小牛蛋蛋糕，就要分成六細份，咁先可以做到一口一個咁食法。順手慢火煮滾啲油佢，到你整完下面個部分就可以煮得。並準備放咗廠房紙嘅碟備用。


2.倒一碗龍舌蘭酒，然後將蛋糕粒放落去索酒。放得越耐酒味越重，視你自己喜好。


3.於蛋糕落炸鍋！炸到每邊都金黃色時就可以撈返上黎。

4.最後將蛋糕放落之前準備好嘅碟度吸一吸油，之後就食得囉！製成品出黎嘅有龍舌蘭本身猛烈的酒香，但又能夠以蛋糕的方式將酒味更持久的留在口中。