2023日本山口県自駕遊 第1日 (福岡市 北九州市 福岡海購城瑪麗諾亞Outlet)

等左三年終於可以再踏足日本，本來係12月尾既行程因入境限制改了又改，終於係三月成行。

今次出入境都係福岡，不過主要行程係福岡県北面既山口県，第一晚留宿北九州，第二三晚留係山口県兩間溫泉酒店後，第四日直接番福岡回港。

班機準時到福岡，出閘就去Toyoxx櫃位拎車。櫃位有張指示行去邊度等shuttle，等左一陣就有shuttle轉載去租車點。

不過今次架車都有小小舊已行7萬幾公里，車身花痕好多，最大鑊係發覺車內既GPS非常唔update，唔少景點同已開一段時間既餐廳入岩電話都冇紀錄，要靠自己經驗或google map幫手先攪得掂，最誇張係離開元乃隅神社去大谷山莊時，發覺有條有正常來回行車線既石屎車路，只可以係google map搵到，行緊條路既時候，架車個GPS顯示我地係凌空飛過個山! 如果第一次租車既話遇到咁既GPS應該會灰到爆。

離開機場先醫肚，出到市區第一站係鮮魚市埸內既市場ずし 魚辰。

雖叫迴轉壽司但迴轉帶冇郁過，我地都係直接同店員落單。

壽司個樣正常，魚類壽司幾好夠鮮味。

魷魚壽司都好。其他如蝦壽司雖然係即刻係店內個魚缸活捉，但入口冇咩蝦味。

三款唔同地區出品既海膽壽司都幾鮮甜，值得一食。

下一round殺入福岡市區，本來想試個間要八點先有位，就決定改去食六點開門既牛腸窩。

重有20分鐘先六點，即刻過隔離街大衆酒場 餃子のたっちゃん食下餃子小食。

餃子餡料十足，皮薄而煙韌。

煎餃底層幾香脆。

不過醃漬淮山小食比餃子更岩我地口味。

食完餃子已六點十分，係時候番六點開門既牛腸窩唐八。

入去已有兩三檯客人，如果冇訂位六點半後walk-in有機會冇得食。

醃漬青瓜都見有人推介，食落個酸甜係平衡得幾好又好開胃。

牛腸窩上場即刻係客人面前烹煮，睇住牛腸由生變熟真係會令人愈睇愈肚餓。

牛腸油份夠入口一刻油香爆出，愛好呢味邪惡野既話真係好易上癮。

食完牛腸窩真係要落格，快快手趁未太夜去左福岡市既海購城瑪麗諾亞Outlet行個圈。

不過可能時間唔岩，唔覺特別平轉頭就離開上北九州市。

由IC去北九州市Hotel Crown Palais Kitakyushu一個鐘內就到。

呢間酒店唔算太新，不過對面有24小時超市有7-11同開到11點既壽司店，都算幾方便。

Check-in完都十點，聽日都唔少行程，就去對面開到11點既はま寿司イオンタウン黒崎店試下。

豉油好多選擇，昆布比較淡而九州風比較重口味。

蝦類及貝類壽司唔錯，雖然已經夜深點但仍然新鮮。

其他壽司水準還好，個樣雖一般但仍有鮮味。

豚肉湯好飲，茶碗蒸都嫩滑。

食完順便去24小時Max Value同7-11行下。

買下生果yogurt同杯麵當宵夜，yogurt幾夠奶香但杯麵就一般。食完要早點訓，因聽日要開始山口県行程同日落前趕到溫泉酒店。

迴轉壽司 市場ずし 魚辰

福岡市中央卸売市場鮮魚市場

092-711-6340

大衆酒場 餃子のたっちゃん

福岡県福岡市博多区上川端町３−１１

092-283-4129

唐八

福岡市博多区上川端町3-3

092-271-8800

福岡海購城瑪麗諾亞Outlet

2 Chome-12-30 Odo, Nishi Ward, Fukuoka

092-892-8700

Hotel Crown Palais Kitakyushu

3-1 Higashi Magarimachi, Yahata Nishi-ku, Kitakyushu-shi

093-631-1111

はま寿司 イオンタウン黒崎店

福岡県北九州市八幡西区西曲里町3-2

570-002-698

MaxValu KUROSAKI by AEON

3-1 Nishimagarimachi, Yahatanishi Ward, Kitakyushu

093-644-7729