麻甩飯局第二輪 : 中央飯店

麻甩飯局黎到下一round，今次搵左老店之一既中央飯店。

舊式酒樓格局，岩曬一班朋友坐底慢慢吹水食飯飲下酒。

粟米斑塊既斑塊比較普通，但粟米汁濃杰度剛好有蛋香又有真粟米粒。

紫蘿炒雞片既雞片都係一般，但獻汁唔錯，酸甜度岩岩好又唔會太杰。

西檸骨就冇咩西檸效果，因西檸汁留曬係碟底而豬排骨又冇俾醬汁包圍。

腰肝卷係今晚最好既出品。

餡料豐富炸得香酥不油，入口又有腰肝味但冇內臟腥膻。

訂左既八寶鴨食味一般，肚內既八寶沒有太濃既鴨肉或鴨油香。

椒鹽鮮魷都幾好，都係炸得香脆又不太油兼保留到鮮魷味。

自己對西湖牛肉羹本來就麻麻，皆因自己唔太好芫茜，所以不作評論。

最後追加四大發明既乾炒牛河，呢個真係估唔到咁好。

河粉炒得夠鬆散但冇炒到爛，而河粉上色上得平均，牛肉入口鬆化唔會太熟，以後想食牛河應該會諗起呢度。

再有機會同另一班麻甩食飯既話，都可能會推介呢度，而且老店只會愈來愈少，有機會真係要食多一兩次。

中央飯店

地址：深水埗大埔道140號東廬大廈地下

Tel : 2777 6888