又有食友準備離開,今次佢想食舊式粵菜,結果大家一行7人就選左金碧酒樓來送別。

湯品既杏汁白肺湯先上,一睇色水都知夠火喉。

湯中有唔少已煎香去腥既豬肺件,湯頭飲落有鮮味,又有不錯杏香配襯。

前菜錦鹵雲吞食落夠脆,錦鹵汁夠酸又好足料。


魚腸蒸蛋都係一絕,一來出面已愈來愈少地方會做呢個菜式,因為會叫呢個菜既人應該唔多,而想做得好食又有難度,所以呢個菜式只會買少見少。

呢度做出黎既效果十分好,蒸蛋做得香滑,食落又冇魚腸腥臭,就算係平時唔食魚腸既食友都食埋一份。

蜜汁燒鱔球都係呢度既好野,鱔球夠厚身有咬口,入口有魚油香而外面就香脆帶蜜香,不過食多幾舊就會有滯滯地既感覺。

如果鍾意食蠔豉既話,蠔豉生菜包係必點,蠔豉落得夠多啖啖蠔肉味。

炒好既蠔豉肉碎食落真係爆香,一入口就係滿滿蠔豉鮮味,就算包幾厚既生菜都掩蓋唔住蠔豉既味道。

金華玉樹雞既雞件食落軟滑兼雞味甚濃,加埋雲腿冬菇片同食就更有層次。


到吸睛既酥炸蟹鉗上埸,每隻炸好既蟹鉗除左外層金黃,份量亦十足。

蟹鉗食落非常熱但唔會好油,入口真係啖啖都係蟹肉,雖然食一舊都幾飽,但真係想食多兩三舊。

肉絲炒麵既麵底炸得夠脆,配上味道剛好既芽菜肉絲芡汁都值得一食。

呢度雖已有58年歷史,但多年來既粵菜水準相對穩定,相信在香港以外都幾難食到有水準既呢類菜式,所以都值得食友們離開前花一晚時間在此。今晚一席相聚後希望食友滿意,也在此祝食友一家以後順風順水。

 

金碧酒樓

地址:彩虹彩虹村金碧樓 22 號地下

Tel : 2320 0937


 順風順水 : 金碧酒樓

 https://www.facebook.com/blackholemini