自家爆炒醬料 : 馬來椰爺 Malay Grandpa Restaurant

早兩個星期六晚經過大角咀，一心想試下點知到門口見大閘半開，一問之下店家話星期六晚要專心炒醬料所以休息。

早兩日下定決心要試，就星期日中午再來，今次就順利入閘位都唔使等。

天氣咁熱就叫杯吉仔冰頂住先，以前組個幾次團去馬拉，由吉隆坡到檳城再落馬六甲都有去搵野食，一日閒閒地都飲十杯八杯吉仔冰。

呢個口味既吉仔冰都係第一次飲，感覺有d似西洋菜蜜既味道。

中午餐牌睇落幾多野但其實好簡單，娘惹特濃叻沙湯、檳城白咖喱湯或香草特濃椰奶湯三選一，再係四款配料既素菜、白魚丸墨丸、金沙骨或虎蝦海鮮四選一就完事。

另外加左鮮牛油班蘭椰香手工咖央多士當甜品。

沙茶金沙骨娘惹叻沙摻摻先到，店家既叻沙醬話用左9個鐘爆炒發酵，真係有聞得到既香辣味，食落唔算好辣但真心香濃冇花冇假。米粉油麵組合既摻摻幾爽，而呢度既油麵口感同出面既有分別，咬落似意粉都幾得意。

雖然金沙骨既沙茶味都幾好，不過呢碗野一定係叻沙醬最吸引，個醬既油香令到個湯都升左呢。

另一碗係檳城白咖喱白魚丸墨丸摻摻。

摻摻既口感同頭先一樣，丸就比較一般唔算好特別，主角都都係加左參巴醬既白咖喱湯，飲落比叻沙湯更辣更甜更重口味。

我地當作甜品既鮮油班蘭椰香咖央多都做到本份，椰香咖央醬既香甜岩岩可以解下辣。

出品係食得出用心製作，醬料既香且濃令人真心回味，食完諗番起當年第一次係北河街巷仔角落食蘇媽．蘇媽既感覺(見另稿)，如果店家保持水準，生意都應該可以更上一層樓。

馬來椰爺Malay Grandpa Restaurant

地址：大角咀櫸樹街62號富多來商場2期地下14號舖

Tel : 5129 8887