面對示威者的控訴
當7.1中午大家滿有信心準備去遊行,喺電視畫面同網絡世界,就算唔係CCTVB,都俾嗰架鐵籠車搶晒fo,我心入面同樣係諗「衝嚟做乜、係鬼呀、引你哋入去、民意逆轉」等等問題,當我開始氣憤嘅時候,見到個舊同事提醒大家「三不」嘅訊息,無錯,無論你認唔認同又好、帶頭推嗰個係咪鬼都好,總之大家繼續做自己認為啱嘅事,繼續發聲,唔會俾任何嘢影響我哋嘅自由意志!

行完幾個鐘再上網,嘩,乜搞到咁啦?係呀,我都認為班小朋友好傻仔,有暑假唔放走嚟食催淚彈、俾差人打!要有幾絕望先會覺得義無反顧同你真搏命去爭取可能無存在過嘅一絲希望,直頭係白痴!

係呀,佢哋係破壞公物,又要公帑埋單!大家做咗22年香港特區人,政府每年都倒幾千個億落啲大白象度,我哋咪又每年繼續仆乖地交稅,個心一早麻木晒。嗰少少玻璃、鐵枝同油漆5000萬咋嘛,是旦超一個資都唔止呢個數!

大家要接受香港已經唔係昔日嘅東方之珠好很耐,而家嘅香港唔同咗,年青人都已經唔同咗。上一代嘅人,凡事大事化小、算數啦;嚟到我呢代,守規矩就代表乖已經唔係絕對,更何況佢哋?大家可以唔認同個做法,但唔可以放棄佢哋,一個都不能少!

科大現任校長史維嘅公開信好值得大家深思:「要全面觀察過去數星期發生的事,應了解示威者的想法,社會應該解決事件發生的根源,現在當務之急,是採取適當行動緩和衝突,各方應以開放態道聆聽各自意見,直接對話,重覆一些相同的聲明或持續衝突,只會帶來更多分裂,最終輸的是香港。」

無論你覺得而家班年輕人好暴力、盲撐警班支持者好暴力、定係警察發泄式執法好暴力,請首先認清暴力源頭,係呢個慣性格硬嚟嘅官員、態度傲慢嘅林鄭媽媽:


完全看不到有人因為這次事件而死?
(69) 103萬人上街:繼續二讀;
(612) 三罷圍佢:讉責暴亂、暴徒;
(615) 期待佢正面回應:暫緩囉;
(615) 死咗第1個人:無回應;
(616) 200萬+1人上街:真誠致歉,已經暫緩咗啦;
(628) 龜縮2星期:好多人以為我死咗,我唔會死;
(629) 死咗第2個人:無回應;
(630) 死咗第3個人:無回應;
(71) 熱烈慶賀回歸:我會繼續聆聽年輕人聲音;
(71) 55萬人上街:無回應; (71) 衝擊立法會11小時:扮無回應; (72) 凌晨4點記者會:讉責衝擊、行為極暴力、揚言追究到底; (74) 聆聽各界聲音,要求閉門會議; (74) 死咗第4個人:無回應...

以上種種,唔係要你認同我,如果你想知道班出嚟上街同衝立法會嘅示威者發咩神經,阻你10分鐘,聽聽幾位同樣熱愛香港嘅香港人講乜:

聽眾烽煙:擺班細路上枱好無恥!【881晴朗7‧2】



一直沒有回應訴求,所以視死如歸?
各位手足,我哋而家仲可以做嘅就係將聲音帶到國際,Twitter、Youtube、海外投稿等等各有各做,用自己力量繼續九唔搭八!