溫碧霞享受二人世界富士山賞櫻花叉電

女神溫碧霞(Irene)正將全副精神拍攝其擔正女主角的新電影《墮落花》，不過忙還忙，為咗演到更好的戲，Irene一早向劇組申請了假期叉電，在復活節期間與老公Kenny飛到日本東京放幾日假浸溫泉、賞櫻花及睇富士山，叉完電回來再繼續為《墮》片搏殺。

Irene今次賣甩囝囝Xavier，與老公享受二人世界，她開心表示此行主要想去東京睇櫻花：「我地去咗睇富士山，滿街都開滿粉紅色櫻花，與及好多不同顏色各式各樣好靚的鮮花，靚到我同Kenny忍唔住手不停影相。」

她表示非常幸運，這幾日東京天氣特別好，平均每日氣溫攝氏22度，不冷不熱又天朗氣清，舒服到不得了，她開心是清楚到望到富士山：「當地人同我地講，睇到富士山係會帶來好運，我地好好彩。」

回港後，Irene要隨即返回劇組開工，她說：「辛苦工作一輪，一定要幫自己充下電，再繼續努力工作，我覺得自己最幸運有個好老公，喺我工作最辛苦時，他會陪我放鬆叉電，Kenny不單止係我老公，仲係我的紅顏知己。」