《你咪理，我愛你！》 王祖藍謝票謝足125場

王祖藍執導的電影《你咪理，我愛你！》上映逾兩星期，票房直衝900萬。為了答謝一眾觀眾在「琳琅滿目」的豬年賀歲檔中，仍願意選擇支持《你咪理》，祖藍由1月31日開始瘋狂謝票，只要人在香港，便由早上十點多開始，跑勻港九新界多間戲院誠心謝票，最高紀錄一日跑足13場，當中有些更是突襲加碼「謝票更」，令入場觀眾喜出望外。

經過個多星期「喪跑」，祖藍最終謝了125場票，誠意絕對爆燈。問到祖藍為何要如此勞心勞力謝票，他笑謂：「咁話晒第一次做導演，都知自己有好多不足嘅地方，所以都好想喺戲院度問吓觀眾嘅第一身意見，希望之後盡量改善。」

他更笑言是次謝票之旅難忘位數之不盡：「首先最難忘嘅，係有一個FAMILY竟然拉大隊嚟睇《你咪理》，為數有成18人。第二係要多謝好多藝人朋友，佢哋雖然只係客串，但個個都好落力謝票，好似方力申、王菀之、白只、劉雅麗、梁嘉琪、陳明恩、大肚嘅岑麗香、苟姑娘、郭晉安、何遠東、蝦頭、吳業坤、王浩信等等。

另外祥師兄（阮兆祥）仲包場請《一圈圈》聽眾睇，真係好多謝好多謝佢哋。第三就係因為有時趕LOCATION，成日冇時間食嘢，所以我最終十零日入面瘦咗五磅，都幾好吖。」