薛凱琪伙拍「閨蜜」鄭融拍廣告

薛凱琪日前為Dior拍攝最新一輯唇膏廣告，為配合「閨蜜」主題，Dior更邀請Fiona和她的好姊妹鄭融齊齊拍攝，她笑言拍攝期間二人重拾小時候的樂趣：「拍攝嘅時候真係好好玩。因為我哋又玩吹泡泡，兩個人就咁拉住手轉圈圈都可以笑到癲咗，因為我哋轉嘅時候都會喺背住鏡頭嗰一秒鐘做啲鬼臉引對方笑場！現場除咗我哋，啲工作人員都睇得好開心！其實如果每次開工都有個閨蜜一齊陪住，過程應該會特別輕鬆愉快，因為感覺幾幸福。」

薛凱琪就話因為工作忙碌，與鄭融一年都是見面幾次，難得今次可以喺工作上有合作，二人覺得特別興奮：「因為平時都係生日、聖誕先會有機會見面，次次都覺得唔夠時間，所以一聽到搵我地一齊開工都覺得好開心，拍完我地仲一齊食個晚飯，趁住呢個機會不停報告近況。」

Fiona就話今次酬勞不錯，仲話自細對化妝品有興趣：「因為我小朋友嗰陣想做畫家，會偷媽咪化妝品去畫畫，加上我又唔愛錫佢地玩到爛晒，所以成日比媽咪鬧！到大個之後都鍾意化妝，我覺得每次化妝都好似畫緊3D畫咁，喺塊面度畫自己鍾意嘅畫。」

薛凱琪就話依家「工多藝熟」，五分鐘就可完成「萬聖節」化妝：「可能我平日比較懶，我試過坐車兩分鐘就搞掂去做訪問。近年興「自然美」，所以化妝都以自然風格為主，除非當日要做騷上台就會誇張少少。我覺得每一個女仔都要懂得去愛自己，每一個女仔喺我心目中都有佢自己獨特美麗嘅一面，而化妝品是用來突顯她們本身的氣質。」