許嘉浩孖黃榕同遊台灣日飲十杯珍珠奶茶

著名形象指導暨藝人許嘉浩(Karl)同黃榕(Gloria)日前到荃灣荃興徑25-31號為全新台式飲品店「四郎製茶」作開幕剪綵嘉賓。被封台式飲料「珍奶達人」細細個開始已經好鍾意飲珍珠奶茶。仲會將珍珠奶茶茶膽嘅香濃情度、珍珠韌度、鮮奶品種等分析得非常仔細,所以有新進場的珍珠奶茶店網民都會睇Karl嘅點評,避免中伏。Karl仲試過喺節目入以面匿名方式估二十間新晉珍珠奶茶店,結果係除左攝影師整蠱佢自己沖果杯之外,其他經試味後全部中晒。

身旁的Gloria都話好佩服Karl係「珍奶達人」仲要飲極都唔肥! 佢仲不甘示弱笑住話自己係「真奶達人」。好鍾意睇台灣綜藝節目嘅佢話睇過台灣人常飲木瓜牛奶同黑糖珍珠鮮奶豐胸,自己都有成日飲。本身對奶類有少少敏感的她只能飲新鮮鮮奶,否則會即時肚瀉。佢哋話「四郎製茶」採用台灣台中老字號供茶商-阿華師茶業和配方,不含咖啡因,以三角茶包泡茶茶味份外香醇。推介飲品包括: 四郎茗茶、香檸玫瑰果茶、黑糖珍珠鮮奶、Oreo熊貓奶茶、燕麥紅豆椰奶、芝士古樹金桂、芝士芒芒……談及台灣,黃榕話同Karl去台灣旅行行幾步就要飲唔同舖嘅珍珠奶茶,試過一整日早午晩加埋飲左十杯!

Karl憶起果次台灣之旅就話：「果次係三年前同黃榕加埋佢男友「三人行」咁去台灣,仲要係佢地岩岩拍拖無人知,黃榕死都要叫埋我一齊去。大家都好鍾意台灣嘅風土人情,一齊去左夜蒲之外仲去左動物園同大擦海鮮。最後遇上大颱風我哋仲要買左好多野食同足夠飲幾日嘅珍珠奶茶番酒店飲。」

講起難忘嘅旅程,黃榕話已計劃下一次同Karl嘅閨蜜行:「同佢去旅行好好,佢會一早search定哂好玩好食好去嘅熱門行程。佢喺唔同國家都有好多當地朋友仔可以帶我哋周圍去,宜家係就緊佢啲時間。」講到早前生日正日喺社交平台上載有男仔準備靚車同生日氣球接載,黃榕話果個唔係追求者:「係一齊train健身嘅教練。因為要開始準備4月另一個健美比賽所以見密咗,唔好誤會。」身邊嘅Karl即時大爆佢又比人reject咗。