《唯獨祢是王II》綵排李亞男佗B探祖藍

李亞男（LEANNE）雖然佗B逾八個多月，但依然活躍，除了於生日正日與老公、家人及好友為即將誕生的女兒舉行 “Baby Shower” 外，早前更捧著巨肚，低調前往探班，為密鑼緊鼓綵排原創聖經音樂劇《唯獨祢是王II》的老公王祖藍打氣。

正式綵排前，導演方家煌帶領一眾演員為該劇祈禱，向來是虔誠基督徒的Leanne亦有參與其中；由於站立禱告時間頗長，李亞男期間不時郁動雙腳，看似有點辛苦；不過Leanne不以為然，更投入地與所有人合唱詩歌。而祖藍正式綵排時，Leanne則化身「得力助手」，細心欣賞老公演出的同時，更不時幫老公拍攝花絮照，兼全程看管住老公的電話、銀包及劇本，十分「廿四孝」。

Leanne事後笑言「是次探班」其實是「正式捧場」：「因為祖藍12月尾正式演出嘅時候，差唔多撞正我生B，我可能去唔到捧場。但呢個幾兩個月，老公差不多日日都要排劇，好多時候排到差不多凌晨時間先返到屋企……見佢咁辛苦，我真係好想支持，同埋見證佢苦練嘅成果。（有冇慰勞辛苦嘅老公呀？）煲多啲潤喉嘅湯畀佢咯，佢要養聲，我依家同佢溝通好多時都係睇口型。」

Leanne又謂現時行動尚算方便，只是不能站立太久：「因為個肚依家真係開始大喇，企得太耐條腰係會酸嘅，但我覺得ok呀，我都依然會周圍去郁動吓，完全唔郁動其實仲辛苦。」