黃建東請媽咪睇三級片自覺「有罪」

藝人黃建東 (東東) 早前拍攝由李宗瑞案件改編的電影《有罪》，飾演情慾女主角(王家淇) 的未婚夫：「劇情講述我發現咗佢拍左條情慾片俾人擺上網，而嗰場戲一嚟就要同未婚妻鬧交，去到片場先至初次認識對方，不過大家都好快熱身全程投入，鬧交鬧到自己都眼濕濕。(使唔使剝衫拍床戲？)其實我覺得作為一個專業演員乜嘢都要嘗試，所以如果有情慾戲我都唔介意出演，但可能導演驚出嚟畫面太油膩所以冇諗住預我拍呢個部份。」

因為東東難得拍電影，所以特別邀請媽媽來看首映，點知部電影被列為三級片：「其實睇都啲情慾鏡頭時都擔心媽咪會睇得好尷尬，點知我媽原來思想仲開放過我，話呢啲小意思啦，佢之前睇過啲歐洲電影尺度仲大，同埋我喺戲裏面着住曬衫完全冇嘢睇，所以都唔會好尷尬。不過如果第時真係有得拍情慾戲就未必會邀請媽媽來看，費事佢喺我隔離睇住我我尷尬到流晒大汗。」

除了拍攝電影《有罪》，東東正在拍攝無線新劇《黃金有罪》，亦剛巧最近熱播的《是咁的，法官閣下》他飾演戲院非禮案被告又俾個官判有罪，所以他笑言覺得自己真係「有罪」：「我最近真係罪孽深重，要做返啲嘢贖罪，不過好開心我嗰幾集大家都有迴響俾我，好多謝陳耀全監製一直俾機會我去開拓不同的戲路，讓觀眾認識不同面的黃建東。」