黃建東參加馬拉松誤會有曲奇食

無綫藝人黃建東 (東東) 日前於白石角海濱長廊順利完成《曲奇跑2018》賽事，不過出名為食的東東笑言原來當初參加比賽是因為一個搞笑的誤會：「最初我聽到曲奇跑以為係參賽者一路食住曲奇一路跑，又或者一路跑一路鬥快食最多曲奇先為之贏。點知到大會記招嗰日先知道原來係冇曲奇食，不過見呢幾個月不停練跑所以就決定參加。平時練習時每次最少跑8公里，本身今次想跑10公里賽事，但因為其他藝人都是參加3公里，加上尋日跑完之後全日要拍《機場特警》，所以最後決定輕輕鬆鬆跑3公里。」

不過東東笑言自己非常大汗，就算跑3公里仍然衣衫盡濕，還飲了3公升水：「因為驚自己中暑，所以未跑嘅時候已經飲咗幾支水，到跑緊嘅時候一路跑一路尿急好攞命。仲要平時跑開都係夜晚，日頭跑熱好多辛苦得多，所以汗都比平時流多一倍。」不過賽事一完結東東驚死消耗得太多立刻食咗大會提供的香蕉、梨及雪糕補充體力，非常之為食。

問到東東減肥大計進行得如何，他說最初為了接拍《機場特警》瘦了10磅，但當個個讚他瘦了的時候，他開心得又食返嘢，所以肥返少少，又再需要努力戒口。