王梓軒為新歌舉行迷你個唱　停車場練歌傳出夜半歌聲

王梓軒（Johnathan）日前出席由網上平台JOOX x 誠品書店舉辦的《慢活音樂》活動，吸引近百樂迷出席，Johnathan亦把握機會宣傳最新派台歌《寄居太虛》，更率先試唱第二首派台歌《邊緣引力》。

王梓軒就話近日忙於拍攝TVB劇集《機場特警》，連續數天通宵開工而令到聲音沙亞，幸得歌迷體諒並出席支持：「好開心可以做Live Show，因為好簡單咁唱歌又同Fans傾計，因為近來音樂上演出係少左，加上最新派左新歌，可以睇下佢地反應，今次個騷唱咗好多舊歌，好似我一個音樂回顧。」

王梓軒透露來年是入行十周年，亦計劃舉行演唱會：「出年就係我入行十周年，今次當係試下水溫，睇下歌迷有咩歌想聽咁。我真係有段長時間冇唱歌，因為拍劇時間真係好癲，但為左出年我依家都要頂硬上，加強音樂方面的演出。」

Johnathan就話為準備今次「迷你音樂會」困難重重，犧牲宵夜時間綵排：「我近排又拍緊《機場特警》，又要宣傳《是咁的，法官閣下》新劇，梗本冇時間同琴師綵排，我唯有半夜時間喺TVB停車場練歌，希望夜半歌聲冇嚇親同劇手足啦！」