究竟做在職媽媽定全職媽媽好呢? 係咪應該為咗小朋友而放棄自己嘅事業?你以為咁樣就係對孩子最好? 呢啲都係好多家庭要面對嘅問題,喺度都分享少少點解我選擇做在職媽媽……

我哋今胎係無請到陪月或者鐘點姨姨,尤其是我哋仲係新手爸媽,起初真係極度手忙腳亂,換衫、沖涼、餵奶無限loop,全部都係挑戰!

坐月嘅時候當然就係留在家中,一嘗全職媽媽嘅體驗。但對於一啲年輕女仔嚟講,「喺屋企湊仔」可能好有幻想,每日嘅生活好簡單,就係照顧小朋友、同佢玩囉。

少年真係太年輕啦!照顧BB最難嘅地方唔單止因為佢哋唔會表達,而且你係控制唔到所發生嘅事,或者咁講,佢哋都控制唔到自己,所以生活絕對係out of control,再加上小朋友係無時無刻需要專注喺佢嘅安全,呢一切圍繞住個小朋友發生嘅,並唔係我哋凡人日常會做嘅事!

照顧小朋友嘅基本動作,就係餵奶/餵食、換片/同佢去廁所、氹瞓覺,佢瞓咗唔係就代表可以休息㗎!

仲要洗衫、洗碗/洗奶樽、執屋等等,仲有自己都要去廁所呢?坐月嗰時仲有機會屋企人經常嚟幫手照顧你飲食,之後就要靠返自己啦!湊BB你可能要喺屋企抱住佢走圍行,仲可以涼住冷氣,大個啲嘅小朋友就要同佢落街「放電」或者去興趣班,真係大汗疊細汗!當以上數出嚟嘅嘢喺你生命入面無限loop,呢啲就係媽媽嘅工作。

做一個全職媽媽,當然可以陪伴小朋友每一刻嘅成長,嗰份開心滿足真係無嘢代替到,如果小朋友係聽話嘅仲有機會可以自在一下添!不過多數嘅小朋友都係活潑嘅,全職媽媽每日都係經歷千篇一律嘅生活,久而久之可能就會無晒熱情,真係需要好強嘅決心呀!





就係經歷過所以更加佩服真係自己一手湊大小朋友嘅全職媽媽!產假之後我就復工,當然就無之前咁多時間陪小朋友,唯有放工、放假盡量畀晒佢。而我亦好好彩,因為奶奶住附近可以幫忙「托兒」,平時我哋返工、放工都會「交收」小朋友。











如果你屋企長輩有時間亦樂意幫手「弄孫」,你哋大可放心返到自己嘅工作環境,去實現自己嘅理想同價值,從另一個角度陪伴小朋友成長!





唔好以為在職媽媽就係代表唔肯湊小朋友,平日放工之後、假期一樣要照顧小朋友,雖然接觸嘅時間係少咗一半,但同樣係咁愛錫自己嘅小朋友。


當然,屋企嘅財政雖然重要,但係人手先係最緊要!屋企安唔安排到長輩代照顧小朋友?或者可唔可以聘請工人姐姐、鐘點?如果自己湊每日要處理啲乜?統統都係需要考慮嘅問題,所以決定做全職媽媽之前真係要同屋企人商量好先呀!



是次小分享完畢,有興趣可按 麵語錄食玩遊記 by Aminn 或 C家重地 其他分享 :)

Aminn | Beauty.Food.Fun.Travel.Trendy| 

麵語錄食玩遊記 by Aminn (Lifestyle) www.facebook.com/m.for.aminn / www.instagram.com/starzaminn 

C家重地 (Parenting)
www.facebook.com/sy.lam.family


 【媽媽的決擇】做全職媽媽就係對小朋友最好?

 www.fb.com/m.for.aminn