《奔跑吧》王祖藍打鼓有氣勢

內地綜藝節目《奔跑吧》呢一集就嚟到杭州爬龍舟，一眾成員齊齊喺地獄教練嘅狂操下，迎戰下一集嘅龍舟比賽。雖然龍舟選手中有女隊員ANGELABABY以及前中國女排成員惠若琪，但佢哋巾幗不讓鬚眉，獲得教練點名力讚。

不過咪以為呢位教練識讚人就好相遇，佢其實相當嚴格，每個細微的動作都執到正，偶有唔滿意，就要成隊由頭再嚟過，搞到班跑男同埋嘉賓個個都面有難色。不過喺一眾龍舟選手當中，應該以祖藍最為當黑，多次畀地獄教練點名糾正，唔係話佢個槳伸得唔夠前，落槳落到唔湯唔水；就係話佢條腰唔啱角度，個人唔夠定，動作慢過人，最後更加索性直指回氣中的祖藍偷懶，並大叫：「祖藍你再這樣下去，肯定划不過BABY的了。」雖然教練多次點名表示唔滿意，但明顯祖藍已經出咗吃奶嘅力盡力配合，有幾次仲辛苦到「紅都面晒」，真係陰公。

不過喺鼓手訓練環節，祖藍就成功「板回一城」，雖然佢人仔細細，但因為夠晒霸氣同埋節奏感，所以即使喺其他環節表現未為理想，最終都獲教練睇好擔任負責帶起全隊士氣嘅「鼓手」位置，令到原本以為自己會淪為後備成員嘅祖藍大為振奮。

而呢集嘅亮點，則喺鄧超同祖藍嘅對決度。無聊度不相上下嘅佢哋，竟然話打鼓嗰陣，要面容瘋狂扭曲先至夠氣勢，最後仲嚟個搞笑示範添。