楊峰初登大銀幕 壓力大到瞓唔著

歌手楊峰憑《極闘4之暴殺令》首次登上大銀幕，第一次拍電影一嚟就喊戲掌摑戲打孖上，楊峰坦言壓力極大：「其實今次可以算係我第一次『真真正正』咁演戲，第一次拍就拍喊戲，深怕自己演得唔好會連累劇組，所以都俾咗好大壓力自己，拍之前一晚緊張到完全失眠瞓唔著。」

戲中楊峰飾演徐家傑兒子，是個與自己性格完全相反的富二代，戲中更要被徐家傑「兜巴星」，但楊峰卻開心話好彩：「其實我覺得自己好幸運，第一次演戲就可以同咁資深嘅前輩合作，徐師傅同身兼導演嘅 Sam 哥教咗我好多，尤其點樣先可以令自己喊得出，被摑時點樣借位先至自然，呢啲都係好寶貴嘅經驗，有錢都買唔到。」

楊峰表示拍喊戲時全靠回憶過去失戀的傷心情史與及在音樂路上的艱難辛酸而激發內心情緒令自己過關：「起初真係好擔心喊唔出搞到NG，不過當回憶返以前嘅感受，啲眼淚就自自然然咁標出嚟！但演戲我畢竟係新丁一名，希望以後可以有更多機會同不同前輩合作，令自己嘅演技可以一步步提升啦！」