艾美琦嘆難識伴侶 要契媽黃夏蕙介紹男仔

藝人艾美琦早前返內地登台，她驚訝觀眾中大部分都報稱自己是單身，令她有同病相憐之感，她說：「今次喺廣西地區做巡迴演出，喺同台下觀眾傾偈嗰陣，我問佢哋有邊個係單身，估唔到全場九成人都舉手，話自己係單身，都唔知係咪講真！

不過時下嘅年青人真係好難搵伴侶，我自己都係未搵到真愛嘅一分子，我媽咪仲成日向我催婚，不過自己一直都係離離合合，仲未搵到一個真正稱心合適嘅伴侶，我媽咪仲誇張到去觀音廟，為我求姻緣符，好想我快啲嫁咁！契媽黃夏蕙間中都會安排飯局介紹好男仔畀我識，好想為我做媒人，幫我拉紅線，不過我始終都係遇唔到合適嘅對象，令佢失望！只怪我自己奄尖，嫌三嫌四又怕對方唔係真心，所以到依家都係暫時投入工作先，或者到緣分真係嚟到嘅時候，我會全情投入去愛呢！」
契媽黃夏蕙間中都會安排飯局介紹好男仔畀佢識。