Electric Girl 挑機高呼PK張立基 雷晴雯再穿舞鞋演電影《極闘6》

日前香港舞蹈團(HKDC)及結界達人於荃灣大會堂上演青春勵志歌舞劇《Electric Girl》，並特別邀請此曲原唱歌手張立基Norman及有「電波少女」稱號的雷晴雯Winnie到場欣賞。此劇主要以八十年代為背景，除了大唱《Electric Girl》、《Stand up》、《跳舞街》、《信自己》等十多首經典金曲外，更直接將張立基「擺上枱」，以抵死啜核對白挑機寸爆「張立基」，令Norman與Winnie不住哄堂大笑，尤其當中演員高聲呼喊的一句：『PK張立基』，叫台下的Norman與Winnie立時拍爛手掌大聲叫好，Winnie更笑言兩人的同行友人皆笑說以後Norman可以多個花名叫「PK」。

與HKDC稔熟的Winnie透露，此劇的編舞Rex趙浩然真的自小就視張立基為偶像：「原來當年Rex覺得Norman跳舞好勁同好型，潛移默化令他愛上跳舞，可說是Rex嘅啟蒙者，所以今次《Electric Girl》，就更希望能找到Norman其邀請他親臨欣賞。」因為偶像而成就出不一樣的自己，令自己變得更好， 身為過來人的Winnie深切明白箇中感受與及深深體會那份感動，便即時告知Norman希望能促成這樁美事。

Norman對整個演出讚不絕口：「鍾意跳舞嘅人其實真係好搞唔掂，那份心癮真係跟足一世點都戒唔掉，音樂一起就周身都『痕』，心痕腳又痕，就算坐喺度都好自然地好似有嘢咬咁，不由自主跟住節拍周身郁！好開心可以欣賞到一個咁精彩嘅演出，而且非常Enjoy，但呢份Enjoy唔係因為個故事提到我同我有關，而係感受到大家心中的那團火，其實邊唱邊跳係非常難嘅一件事！」謝幕後Norman更嚟個反擊突襲，以神秘嘉賓身份突然上台與眾演員來個真「PK」，即席演唱 “Electric Girl”，全場觀眾企晒起身一齊跳，全場High爆，Norman亦感激大家對 “Electric Girl” 的支持，畢竟此歌已有25歲但至今仍得到大家的支持讓他可以一直繼續唱落去。

同是舞癡的Winnie與Norman一樣全晚坐唔定，一叫觀眾一齊跳就第一時間彈起身，更笑稱「超難得可以喺大會堂企起身跳舞，有得跳都唔跳咪蝕晒！」Winnie亦被故事裡的生離死別與實現夢想的矛盾情節所感動，不禁感激Norman對她一直以來的鼓勵：「由我重新跳返芭蕾舞的第一日開始，Norman一直俾我好多鼓勵同支持，亦會叮囑我切記量力而為，呢份關心其實俾咗我好大嘅動力。」

Winnie將於電影《極闘6之飄移都市》中出演其中一角，且會有跳芭蕾舞的戲份，對曾經被醫生判定下半生必須與輪椅柺杖作伴的她來說，Winnie坦言意義非凡：「這次演出對我來講是絕對的浴火重生，發夢都無諗過會有一個咁珍貴嘅機會，所以格外珍惜同感恩。最近正緊密練習加強訓練。呢段戲份除咗證明俾自己睇我終於做得到之餘，更加係為咗當日相信我、支持我、鼓勵我嘅人而跳。」