香港嘅夏天天氣翳悶，仲時不時落幾日大雨，喺又濕又熱嘅環境下，自然會滋生蚊蟲。著住單薄嘅衣衫短褲，手臂、大小腿隨時被咬得一撻撻，紅腫到豬蹄咁……
唔想手腳變成蚊蟲嘅晚餐，誓要同佢哋嚟個正面對決！
1. 橙皮
其實蚊好怕橙皮嘅氣味，食完橙之後唔好扔個橙皮，將佢切絲曬乾，放喺疏窿嘅袋入面，再掛喺門口或窗邊，就可以驅蚊！
2. 醋
比起蚊更難搞嘅絕對係細細隻、打都打唔死嘅蠓。我哋可以用蠓最鍾意嘅白醋，再加入幾滴檸檬味洗潔精，倒入一個樽仔，攞錫紙封住蓋口，再喺上面拮幾個窿仔，就可以引晒啲蠓嚟送死！
3. 香茅油
香茅油嘅氣味可以驅趕蚊蟲，但要留意精油嘅氣味容易揮發，發現無乜味嘅時候就要補噴。
4. 草藥防蚊包
用各種中藥混合而成嘅中草藥包，獨特嘅氣味可以防蚊蠓，只要去藥房執齊8種材料：丁香、艾葉、白芷、蘇葉、薄荷、石菖蒲、藿香、金銀花，再用疏氣嘅袋入住掛起就可以喇。
5. DIY 蚊怕水
除咗中藥防蚊包以外，大家都可以DIY蚊怕水，確保天然仲不含化學成份！
材料：
小茴香3錢、陳皮3錢、薄荷葉3錢、金銀花3錢、香茅精油、艾草葉3錢、藥用酒精50cc
做法：
先將水蓋過藥材，煲成一碗；混合6-7滴香茅精油同藥用酒精，最後再加埋中藥水。然後入落噴樽入面就okay，隨時隨地Stüssy都可以攞嚟噴。
6. 水槽倒植物油
將植物油（如橄欖油、粟米油）倒入水槽，當蠓飛過就會被油黏住，郁都無得郁！比啲恆心試多幾次就可以完全消滅可惡嘅蠓！
7. 食大蒜
蚊好怕汗液分泌出嚟嘅大蒜味，唔怕強烈口氣嘅朋友可以一試。
8. 少用香水、有香味嘅護膚品、化妝品、髮膠
蚊蟲都鍾意有香味嘅嘢，特別係花香。所以以上所講嘅都好惹蚊，想唔畀蚊咬，就無咩必要喺夏天都唔好用喇。
9. 盆栽要定期換水
積水、污水最容易滋生蚊蟲，所以夏天要勤力啲幫植物換水同清理積水，等蚊蟲嘅卵無足夠嘅時間成蟲！
（圖片來源：getty、tumblr）
