當你第一眼望一個人，除咗望個樣靚唔靚、對眼有無神之外，其實眉毛都一樣咁重要！就算你雙眼又大又水汪汪，假如係無眉娘嘅話都即刻大大扣分！
以下就講吓想有靚眉8樣要注意嘅地方，大家努力啊！
1.眉毛比較稀疏嘅人可以臨瞓前將橄欖油、杏仁油、菎麻油混合嘅精華油搽喺眉毛位置，跟住按摩3-5分鐘，有助毛髮生長。
2.根據自己嘅臉型嚟決定眉型，分清楚眉頭、眉峰、眉尾嘅位置。
3.方臉嘅眉峰就要畫得柔和啲同粗啲，避免畫得太幼太短。
4.圓臉嘅眉峰要高啲，眉尾就要比眉頭高一啲。
5.心型臉嘅眉毛就要畫得平滑一啲，將眉峰畫得柔和啲，亦避免畫得眉峰太高。
6.橢圓形臉嘅人就適合畫一字眉或帶少少弧度嘅眉。
7.當決定好適合自己嘅眉型後，都唔好忽略眉毛周邊嘅小雜毛啊！用鉗拔完雜毛記得用冰或者雪凍嘅化妝水濕敷一陣，就可以避免紅腫。
8.到正式畫眉嘅時候，記住要揀啱同頭髮配合嘅顏色，先用眉刷掃順眉毛，然後畫出眉型嘅輪廓，最後先填滿佢。
掌握到以上嘅8個技巧，相信大家都可以畫到適合自己嘅眉毛，令妝容更完美！
