虛擬實境（VR）技術近日非常受歡迎，不論係遊戲定係影片都有大批捧場客。但除咗消閒娛樂之外，大家有無諗過VR原來仲有醫學用途呢？

根據英國衛報所指，VR喺不久嘅將來或會廣泛應用喺心理治療上面。英國倫敦大學學院（University College London）臨床心理學教授 Chris Brewin 表示，VR技術有助治療驚恐症。病患者可以喺唔會造成實際傷害嘅情況下以VR感受令自己驚慌嘅人、事、物，令佢哋可以直接面對心理陰影。教授更表示15個運用VR治療憂鬱症嘅病人當中，其中9位嘅病情都喺一個月內有好轉，表現令人鼓舞。

除咗英國之外，美國南加州大學負責研究VR醫療嘅教授Albert Rizzo指VR可以治療軍人嘅創傷後壓力症候群（PTSD），唔少由伊拉克、阿富汗戰爭服役完畢嘅士兵都飽受煎熬，而VR技術正好提供一個安全嘅環境畀士兵面對心裡嘅陰影同創傷。

其實每個人心中都總有對特定事物驚恐嘅時刻，但我哋都會傾向逃避，或者VR可以幫到大家面對同克服無形嘅恐懼！

（圖片來源：tumblr）