ViuTV劇集《詭探》播放在即,早前車保羅和尹揚明於西環紙扎店取景拍攝,而Mr. 樂隊成員MJ亦客串參演。尹揚明坦言與車保羅相識相識於微時:「以前拍野都未試過同場做戲,未入行已經識佢架喇!今日嚟紙扎舖拍攝都見慣晒,細細個都已經上香拜神,不過原來啲祭品咁先進,電話、跑車都扎到,真係要乜有乜!」

尹揚明工作不斷,不斷遷就檔期才順利拍攝:「近排又接左電影啦,所以忙左少少!而且我一向都好少捱夜拍攝,呢晚唔洗講一定會通宵,第二日仲要接電影嘅中班!」

車保羅近日人氣急升,很多工作接洽但都是「冇米粥」:「多左人傾吓囉,但係都傾吓先囉,不過有乜所謂,橫掂我都有份正職,要幫手個時咪盡量合作!(經濟生活係咪好咗?)呢個一定係啦!不過依家市道真係麻麻,你話我值幾多咪俾幾多錢囉!(家人有冇投訴你太忙?)冇辦法架啦,總之你有(家用)交比佢,咁佢地冇野講架啦!湊孫之嘛,你要靚衫我咪比件靚衫你,但都要爺爺搵到先得架!我仲欠老婆粒鑽石都未買到俾佢!」

車保羅笑言十多年沒拍港劇,難得與尹揚明過足戲癮,有信心與對方一Take過提早收工。

而趙碩之和「文青女神」楊偲泳亦為「詭探」開工,趙碩之飾演私家偵探調查靈異案件:「我今次都出動私伙衫黎拍,之前都同記者做資料搜集,學吓跟蹤等技巧,希望拍出黎更自然。」


趙碩之自爆曾發現前度男友不軌行為:「洗乜花呢啲錢請私家偵探,男朋友電話用手就攞到啦!你試過攞一次就唔會想攞架啦,因為發現古怪野!不過都過咗去,當時要打要鬧都做晒架啦!」


楊偲泳笑言自己警覺低,一定會令男友發現:「我自己好遲鈍架,做唔到大事!如果要查一定會比對方發現,反而比人Check自己就真,我一定唔會知道!」


 【ViuTV 詭探】車保羅與尹揚明過足戲癮

 https://www.facebook.com/starshk