去旅行固然係件開心事，但要喺狹窄嘅飛機艙中度過幾個鐘，甚至係十幾個鐘，仲要食住淡味又唔新鮮嘅飛機餐，真係好辛苦。到底點解飛機餐咁難食呢？原來除咗擺得耐唔新鮮之外仲有其他原因。以後唔好怪預備飛機餐嘅工作人員點解唔整好食啲喇！
以下就同大家一齊分析飛機餐難食之謎。
1. 擺放時間長
每日上落嘅航班咁多，載客量成千上萬，要預備嘅餐盒數量好多，所以製作工場決定餐單時都以數量同速度優先，絕對唔會同你慢慢雕琢一份「五星級名菜」出嚟。而且餐盒由整好到出餐，中間大多已經隔咗12小時或更耐，所以味道自然無咁新鮮。
2. 飛機引擎的噪音
除咗餐盒本身嘅質素，其實飛行環境亦係令飛機餐倍感難食嘅重要原因。飛機引擎造成嘅噪音會減低乘客品嚐甜、鹹味蕾嘅敏銳度，令食物變得淡而無味。大家可以配戴耳機聽音樂嚟蓋住引擎聲，減低影響。
3. 氣壓低
喺飛機上特別容易覺得無胃口？原來係同大氣壓力低有關。低氣壓除咗導致水腫之外，仲會令身體消化嘅速度減慢，所以我哋會特別覺得飽飽滯滯或無咩胃口，自然食咗幾啖就唔想食份飛機餐啦！
（圖片來源：tumblr）
