犀面人

住處隔涉，平時除非有約定賭局，否則好少有人實驚無神搵我。

嗰晚仲要係零晨一點，一個雷電交加嘅晚上。

原來平生就算不作愧心事，無端端有人夜半敲門，其實都幾驚。半夜三更一聽敲門聲已經嚇一嚇，透過防盜眼望清楚，恐怖過見鬼。

站在門外靜候的是死黨 Benson，他正拿著一瓶酒。

每次 Benson 攞酒上嚟，都有大鑊嘢。

例如。

高考放榜，成績不是十分超卓的他，以為要放棄做律師的宏願；小伙子仕途失意，拿了一打青島上來，我聽他當天立誓，就算進不了港大也要入城大讀 law。

又例如。

考獲律師資格之後，有份參與一個接一個融資大刁的他，收到行家高薪挖角的邀請；超新星光芒四射，拿了一瓶 Barolo 上來，我由晚飯聽他曬命曬到宵夜。

再例如。

一向視家中的黑貓如親人，某天親眼目擊小黑從露台一躍而下的他，找了三天三夜也找不到屍首；愛貓狂哭成淚人，拿了一樽黑龍大吟嚷上來，我聽他哭說以前如何跟小黑一條魚兩份食聽咗四次。

今次佢攞咗支 X.O 上嚟，講真，我咁大個仔未同人隊過 X.O，我有啲驚。

除完鞋除襪，攞完冰攞杯，佢已經當咗呢度係自己屋企。「屋企冇晒蝦條？」我拎頭。「我上次買啲 doritos 呢？」你對上一次上嚟係半年前喎大佬。「花生有喇掛？」有合桃。「照殺。」

到底咩事？

他倒了大半杯酒給自己，連冰隙中溜出來的每一滴也嚥下了。欲言又止的他，眼眶凝聚了一顆大淚珠。「你一定要幫我寫衰佢！」他說，眸子的紅筋暴現。

邊個佢？「嗰個影相佬！」邊個佬同你影相？「唔係同我影，係同我哋影。」記起了，Benson 跟 Marissa 的愛情長跑，下年將會有一個完美句號。Marissa 任職六星級酒店高層，婚禮呢家嘢， 梗係只會 settle for the best。所以 Benson 口中的「影相佬」，一定是每對新人也要千挑萬選的 wedding photographer。

影相佬做錯啲咩？

「你知我㗎，我乜嘢都就晒 Marissa 㗎喎……」他「砰」一聲放下酒杯便開始滔滔不絕。「佢話想搵呢條友影相，我咪同佢上去見吓條友囉。一去到，哈，我已經心知不妙啦，個 office 懶 high 咁，即係好似你屋企咁呀……」坐在飯廳的他，勞氣地指手畫腳。「即係好似你屋企咁呀，黑沉沉就以為係 style嗰隻呀，我預咗畀佢鋸到一頸血㗎，好彩我之前已經見咗幾個影相佬，收得幾貴，我心入面點都有個底，五、六萬我都會接受㗎喇，嘩，點知……」停一停，飲一飲。「X 佢 XX 個 XX，佢同我講八萬，八萬呀大哥，佢覺得自己憑咩收八萬呀，我影完變郭富城吖？仲唔知要啲乜要啲物就另外再加錢……」

咁點解要寫衰佢？

「葉生，可唔可以畀我講完先？」Sorry，咁你可唔可以講重點。「重點？得，重點係佢犀面，佢犀我面。」無端端犀你面？「獅子開大口都係等人還價啫，你估我好蝦，佢開八萬，我咪還佢五萬囉，最後我預六萬成交㗎喎，點知我一還五萬，佢就話咁嗰日佢寧願唞唞，叫我搵第二個影，犀晒面要送客咁款。」

明白了，Marissa 搵唔到呢個 photographer 影，好唔高興，搞到你都好唔高興，所以要寫衰佢，correct？「全中。」

你要我寫衰佢，有冇人哋全名呀？

「有，佢叫 Dennis Mok。」

如果這位 Dennis Mok 真的有說過「寧願唞唞」，繼而犀面送客，我覺得佢堅型。絕不可以寫衰，還要唱好，因為我們香港需要這種人。

雖然我不知道這位 Dennis 到底有沒有犀面，但就算他真的犀面了，也不是沒有道理的。想清楚，「錯」其實不在這位攝影師，而是在於那些把「減價」兩個字說得太輕易的其他人。就是因為「減價」兩個字今時今日已經掛了在每個打開門做生意的人口邊，才會讓那些不輕言減價的人看起來那麼「寸」。

每一行都是這樣的：你收得貴，就總會有一大堆唔識嘢嘅人話你癡線，然後呢啲話你癡線嘅人，就會去幫襯一啲收得平嘅鋪頭，跟住覺得自己做咗一個好聰明嘅決定，最後仲要加句，啲相咪又係咁影，條魚咪又係咁蒸，對鞋咪又係咁擦，個頭咪又係咁剪，有咩分別啫？

我當然唔係話「貴」就代表「好」，但從做生意的角度看，收得貴其實是為自己的行業保留著一份尊嚴和生存空間。你賣牛腩麵，賣開四十蚊碗，跟住隔離街賣三十蚊碗，你就開始驚，驚冇人嚟幫襯，於是賣二十蚊碗。你碗牛腩本來收得起四十蚊，但就因為隔離街整得冇你咁好食嗰檔自動減價，你就唔敢守住自己嘅招牌。

如果你賣的是服務，而顧客臨門第一個動作便是開天殺價，其實都幾侮辱。顧客永遠是對的，所以不要怪他們；有些人就算家財萬貫，思想就是這般草根，他們的內心只有一個算盤去計算價錢，而從來沒有一種品味去衡量質素。

頂爛市係一件好恐怖嘅事，唔單止拖跨你生意，仲會摧毀整個行業。

這個城市窮得只剩下金融業？可能是吧，and the sad thing is 連這個行業也被越來越多內地人搶佔了。

香港需要更多犀面人，因為就是他們這份傲氣，捍衛著「質素」兩個字的價值，保護著每個值得尊重的行業，守護著我們這份，one two three 大聲啲，香港精神！