女人成日都抱怨男人唔明自己諗乜，而男人就經常會話唔明女人無啦啦嬲咩。其實男人如果唔想踩中地雷，令對方嬲咗自己都唔知乜事嘅話，就要留意以下嘅15件事！

1. 女人係情感嘅動物

女人大多都情感氾濫，希望得到愛，但亦好容易受到傷害，而且害怕對方對自己無晒興趣。所以如果男士覺得女朋友情緒唔穩定嘅話，簡單一個擁抱、同佢講我愛你，令佢覺得自己被愛，而且受到重視。

2. 唔好覺得女人奉旨要做某啲嘢

無論係約會定係性愛，女人都唔係奉旨要應承㗎。做啲咩或者有咩要求都好，唔好令女人覺得你認為佢係奉旨要做或無理由拒絕，記住要尊重對方嘅意願同感受。

3. 如果覺得自己得唔到性感嘅女人，或者係時候反省你嘅標準

男女都會對自己嘅夢中情人有多多幻想，但到底實唔實際呢？男女都好，其實定咁多擇偶標準，跟住佢哋嚟行，最終係咪真係揾到呢？就算中晒你嘅標準，又係唔係真係適合你呢？

4. 突然離開比起親口講分手殘忍百倍

每一段感情都應該尊重對方，就算之後覺得對方唔適合自己都好，都應該要好好解決，而唔係粒聲唔出地一走了之。

5. 唔係每個女人都係為咗錢

「雞，全部都係雞」？其實唔係每個女人都會為錢而同男人一齊！所以都唔好先入為主用咁嘅mindset放落你遇過嘅每一個女人身上。

6. 覺得女權主義者只係憎恨男人或取笑佢哋

無論你認唔認同女權主義都好，或者覺得佢哋嘅做法太誇張，但無可否認嘅係女性嘅權益的確需要被尊重，唔應該被男人侮辱。

7. 你嘅下體照一啲都唔性感

無錯，男人通常都會對自己粗壯嘅下體感到非常自豪，但無咩必要都請唔好亂咁send你嘅露體照過嚟，尤其尤其尤其係對方只係你嘅普通朋友！

8. 女人唔係你發洩情感或壓力嘅工具

同第2點一樣，女人唔係奉旨要安慰你受損嘅自尊心，更加唔係你發洩情感嘅工具。你嘅感受應該由你自己負責。

9. 侮辱女人一啲都唔man

咁樣唔單止唔man，更反映你內心嘅自卑，試圖踐踏女人嚟提高自己嘅地位，咁係一件好核突嘅事。

10. 被friendzone後態度變得好差

被女仔friendzone後，男人嘅態度如果即刻180度改變，變得小器無風度，咁只會令人覺得你好小家，追唔到人就即刻變臉。其實換個角度睇，friendzone都係禮貌地拒絕你嘅方法嚟啫。

11. 覺得自己已經對人好nice，但點解仲係無女朋友

如果你有咁嘅諗法，咁你真係傻仔。對人nice同有禮貌係每個人基本都要做嘅事，只係做到呢點就覺得自己已經好好，唔明點解無女朋友，咁你離拍到拖真係仲有一段好長嘅路。

12. 死纏爛打

女仔講咗唔好，就代表唔好，無論你問佢幾多次、纏住佢幾耐，都唔代表對方會改變心意。相反，佢只會覺得你愈嚟愈討厭。

13. 你唔可能逼一個人愛你或留喺你身邊

幾傷心都好，你都要接受呢個現實，無論你做咩都好，你都唔可能逼到一個人改變心意愛你，所以索性唔好咁做啦。

14. 自私嘅人只會孤獨終老

每人都有自私嘅一面，但如果你總係唔理伴侶嘅感受、只顧自己，無論男女你都只會落得孤獨一人嘅下場。

15. 唔係每個人都會揾到適合自己嘅伴侶

經歷多次離離合合後，或者有人始終都係揾唔到自己嘅理想伴侶。與其藥石亂投，唔理咩人都中個頭埋去，不如保持單身。其實自己一個都可以過得好好，唔需要夾硬揾一個錯嘅人留喺自己身邊。

（圖片來源：tumblr）