忘記果啲所謂嘅星相命理，亦唔只係可以揾朋友幫手，命運其實係掌握喺自己手中。如果遇到困局或關鍵嘅時刻，你第一時間諗嘅唔應該係對外求助，因為最好嘅答案就喺你嘅心入面，只係睇你肯唔肯揾出嚟，同真誠面對自己嘅感受。

無論係關於愛情、工作，或者任何大變動，聰明嘅女士們都應該問自己呢5個問題，每日都要問，咁就唔會有迷失、唔知自己做緊乜嘅感覺。

1. 我係個點嘅人？

你對上一次認真思考自我係幾時呢？你嘅角色並唔係人哋同你講覺得你係點、你應該點樣做，或者係想你成為一個咩人，你真正嘅諗法只有你自己最清楚，亦唔到別人強加定義喺你身上。試吓思考並且寫低自己嘅感受、睇法、價值觀等作為日記，咁你會開始了解自己更多，亦有助於揾到真正想要嘅人，同埋想做嘅事。

2. 我嘅行動反映到真正嘅我嗎？

甘地曾經講過「幸福就是當你所想、你所說和你所做的事都和諧一致時。」但現實中好多人並無跟隨自己真正想要嘅生活方式，反而係為自己訂立一個又一個規限、跟住俗流而行，呢個或許就係點解我哋好多時覺得迷失嘅原因。

3. 我真正想得到嘅係咩？

我哋每做一件事之前都應該諗吓我哋最終想得到啲乜。例如係減肥咁，辛辛苦苦咁節食，每餐只係食菜、飲果汁，到底係為咗咩呢？係想自己靚啲、怕人哋覺得自己肥，定只係為咗穿得落嗰條好鍾意嘅窄身牛仔褲呢？
做每件事都總有個目的，做之前首先搞清楚呢點，咁就會知道你到底應唔應該做，亦可以認清你嘅目標。

4. 到底諗咁多嘅意義係咩呢？

女人都係情緒化嘅動物，好容易就會陷入擔憂同恐懼，但到底我哋有無諗過點解會咁呢？又有無逼自己諗過擔憂背後嘅邏輯呢？逼自己面對同認真諗過之後，或者你就會發現佢哋都只係毫無來由嘅恐懼，唔好嘥時間令自己俾情緒牽住鼻子走！

5. 點解我唔可以呢？

當見到身邊嘅朋友行得比自己快、成就比自己高，甚至已經結婚生仔，再望返自己，好似未來離自己好遙遠。其實與其只係羨慕人哋嘅成就，倒不如諗吓點解人哋做到而自己唔得呢？當中係咪有咩問題，或者係自己做得未夠好呢？反思自己嘅不足，諗吓可以點樣進步，再付諸行動，其實人哋有嘅你都可以有！

（圖片來源：tumblr）