【為藝術犧牲】劉錫賢拍劇逼爆棺材

劉錫賢（肥仔賢）日前為ViuTV拍攝電視劇「詭探」，被導演要求企進棺材取景，肥仔賢自嘲是梁思浩接班人，甘願為劇集而犧牲：「從來都未試過要瞓棺材，不過原來都幾窄下，真係逼逼地。其實做演員都唔怕得咁多，反而媽咪一早準備定利是比我，做得呢行有時都信下習俗好！」。

劉錫賢首次參演ViuTV劇集，坦言跟亞視年代的製作有很大分別：「以前喺亞視都拍過好多鬼片，不過好多制肘，好多野都話唔拍得！今次人地用電影嘅拍法，感覺好新鮮而題材又大膽，成個環境都有好大分別。」

劉錫賢自離開亞視後工作不斷，坦言唔敢推Job怕得罪朋友：「推一次之後人地唔搵你架喇，所以依家咩都接，之前要拍網劇，導演問我肯唔肯露股？其實我有乜所謂，為套劇去犧牲我就真係唔介意。」

劇中劉錫賢飾演變態降頭師，除了瞓棺材之外，更經常與各式神像及布偶做對手戲，令現場氣氛變得鬼魅：「邵仲衡拍拍吓又話撞邪，我就未見到有，不過我唔怕架，可能我個樣比較福相冇事啦，所以我都同佢（邵仲衡）講，有咩恐佈野搵我頂晒佢。」