鄧紫棋（G.E.M.）世界巡迴演唱會《Queen of Hearts 2017 World Tour》進入最後倒數階段，頭場將會在本周六（4月1日）假廣州國際體育演藝中心揭開序幕。G.E.M.近日正密鑼緊鼓為巡唱排練，聯同早前在公開選拔賽選出的12位舞蹈員，齊齊閉關打造秘密「舞」器！

在美國排舞師Kevin Maher的指導下，G.E.M.率領一眾舞蹈員進行「地獄十式」訓練體力及拉筋，排舞室瞬間變成「人體奧妙展」。事關G.E.M.當場施展軟骨功，當場做出一字馬、拱橋、鉸剪腳、腿放頭上等高難度動作。雖然她過程中表現輕鬆，不過在示範拱橋時狀甚痛苦，最終忍不住搖頭「投降」。

親自揀衫揀蟀
今次巡唱無論在舞台、舞蹈、戰衣及歌曲等方面，G.E.M.每個過程都高度參與，所有舞蹈員更是由她親自挑選：「12位舞蹈員都好犀利，來自世界各地唔同地方，我覺得揀出嚟嘅係最強陣容。正式展開巡唱之後，我會叫佢哋每人都私人教我一堂，咁我跳舞就會再叻啲。」

G.E.M.在服裝上亦提供了不少意見，做足準備功課與造型師Emma仔細研究設計：「其中一件外套初步畫出嚟嗰陣，我已經同造型師講個袖要闊啲、咩質料會適合我，我直頭搵埋參考圖片畀佢。另外有一件服裝好有創意，件衫會係連住個舞台，所以話今次成個團隊都好畀心機，帶動我更加要努力去完成今次巡唱。」

日吃3400卡路里
而演唱會每一部分均會表達不同的訊息給歌迷，當中不乏G.E.M.的人生觀，並將它們透過表演呈現出來，她說：「大家都會為所愛嘅人煩惱、心痛、受傷，但又會為心愛嘅人感覺到希望。每個人去到死嗰刻會記住嘅，唔係你人生達到咩成就、賺咗幾多錢，而係諗我留咗啲咩畀愛我嘅人，愛我嘅人又留咗啲咩畀我。」

如今演唱會如箭在弦，加上今次整支團隊實力屬世界級水平，擔大旗的G.E.M.難免感到壓力愈來愈大。本來她為了保持最Fit狀態而刻意節食，不過最終難抵誘惑，一口氣吃三大包薯片減壓：「最近壓力真係好大，前幾日我綵排嗰陣見到休息室有好大包薯片，我已經一年冇食過，一見到就好掛住佢。原本打算只食一塊，點知最後食晒成包，返到屋企仲係好掛住包薯片，仲走咗落超級市場買多兩包食，我計過嗰日食咗3400卡路里落肚。」