偷食嘅人想保守秘密唔畀人知，但紙包唔到火、天網恢恢，總係有機會被人撞破。如果撞破嗰個人係你，喺無意中見到朋友嘅另一半偷食，你會唔會揭發呢？

社會心理學家Justin Lehmiller就此做咗項研究，並獲刊登喺《性行為檔案》期刊。研究收集咗487個大學生嘅數據，當中大部份係女性，而平均年齡係19歲。佢哋需要完成一份網上問卷，問卷問及「請幻想如果你知道有人拍緊拖（A），你知道A嘅伴侶（B）同另一個人（C）發生「陰道性交」，請就住唔同情況，表示你會有幾大程度傾向話畀A知。」

研究結果顯示，有89%嘅受訪者都表示傾向話畀C知，尤其係當C係自己嘅好朋友。調返轉如果係自己嘅朋友偷食，就大多會保守秘密。

另外，偷食人嘅特點都有關係，例如佢係咪喺財政上倚賴對方、係咪有偷食嘅前科或者正準備結婚，同埋係持續偷食，定只係一時抵受唔住引誘等，呢啲都係最大機會影響住A選擇講定唔講嘅因素。

但要注意嘅係，呢項調查只係針對「陰道性交」，但現實中出軌可以有好多方式，例如口交、愛撫、接吻等。咁到底呢啲情況下，唔同嘅人又會點做呢？呢點就值得再商榷喇。