一步一驚心！雨僑冒雨上梧桐寨瀑布

昨日雨僑Ava為運動品牌拍攝行山特輯，雖然天公不造美，又濕又落雨，但Ava做足行山措施，又獲猛男教練團隊同行護花，所以全程有驚無險，安全着陸。

Ava以前都有行山經驗，但次數不多，豈料今次一嚟就挑戰被譽為「香港四大自然奇景」、位於大帽山北的梧桐寨瀑布，可算藝高人膽大。梧桐寨瀑布由群瀑組成，多條路段都經狹道峭壁需攀石而上，相當考驗腳骨力同體力，弱質纖纖的Ava冒雨行山，雖一身輕便運動裝，披雨褸仲帶埋行山杖，但因為路段難行，Ava基本上爬多過行，中途更已輕微腳震，不過她意志頑強，震住震住四個鐘終於走畢全程！

Ava事後都攰到散晒，她說：「我真係堅有毅力，其實去之前我已經隊晒成盒豬扒飯，但體力好快用完，因為呢次行山比預期中難度高咗，加上中途落雨，好多路途都要爬，好在有枝行山杖同埋都係跟大隊，一路篤一路爬吓爬吓就到山頂，係好攰嘅，不過過程都好充實，行山都係一種樂趣嚟嘅。」