【將拍溏心風暴3】胡琳生日會與粉絲談心

胡琳Bianca日前出席由粉絲舉行的生日會，數十名歌迷送上蛋糕及氣球，每人更可與胡琳單獨對談2分鐘：「成個過程好好笑，佢地個個扮晒震定，點知一坐低就口窒窒唔知講咩好，不過我都會把握機會多謝番佢地支持！」。

胡琳現忙於綵排風雲舞台劇，稍後亦參與拍攝《溏心風暴3》，將期表排得密麻麻：「好多人都擔心我點分配時間，其實只要準備充足同心態好就可以應付！我一早知道今年會好忙，公司安排左好多具挑戰性工作比我嘗試，音樂劇、拍劇過去都冇機會去做，今年按計劃進行努力工作。」

胡琳坦言音樂仍放在首位，向歌迷保證再出新廣東歌：「今年仲會有新嘅廣東作品推出，依家又係演員又係歌手，要好好兼顧呢幾個身份！遲點拍《溏心3》 我都緊張架，期待同一班好戲之人對戲，自己會以學習心態去拍攝，人地咁多經驗，應該好快投入到角色！」