大部份男人都唔係太識點樣表達自己嘅情感，有時都好難判斷到底佢哋心裡面真正諗緊咩。而且男人通常都被社會標準標籤住要撐起頭家、做一家之主，表達情感就好似會令自己嘅形象變得懦弱，亦因為咁好多女人都會左思右想「到底佢愛唔愛我呢？」。
想知呢條問題嘅答案，其實唔一定要問出口嘅。對於唔擅於講嘢嘅男人，觀察佢哋嘅行動更加實際！
1. 佢愛嘅係真正嘅你，而唔止係外表
雖然呢個社會愈嚟愈鼓吹大家去追求外表嘅美，但諷刺嘅係其實仲有更多嘅男人係講個心多過講樣，因為得個樣但性格好差嘅話，相處落去都好難頂……
如果一個男人願意接受你所有嘅優點同缺點，仲會無條件地支持你，咁就證明佢好愛你！
2. 佢會保護你
男人真正愛一個人嘅時候係一定會保護伴侶，無論係身體定心靈上都唔俾對方受到傷害。佢哋會寧願自己受多啲苦，都希望保障另一半嘅安全，更加唔會打或者虐待對方！
3. 佢希望知道你嘅意見
無論係大至政治、宗教，抑或細至屋企幅牆髹咩色，佢都希望知道你嘅意見。即使係兩個人嘅睇法有唔同，佢都會給予尊重。
4. 佢會為你奮不顧身
當一個男人知道你需要幫助嘅時候，願意拋低其他嘢嚟照顧你；只要佢做到嘅，佢都會為你解決問題；佢會永遠將你嘅需要同感受擺喺第一位；做齊呢3點，就證明佢呢一世都唔願意扔低你。
5. 佢對自己有信心，希望你有自己嘅社交生活
當大家認真發展一段關係嘅時候，好多時都會遇到一個問題：相處上有幾依賴對方。有啲男人會因為自卑感作崇而管住對方去邊度、同邊個出街，甚至係著咩衫都要理。但如果佢對自己同伴侶都有信心嘅話，佢會畀你自由，唔會下下都干涉你嘅社交生活。
（圖片來源：tumblr）
