如果唔想人去你去，連去旅行影張相都同人哋撞晒嘅話，其實世界上仲有好多其他新奇又古怪嘅景點可以選擇。
The Talko就揀咗世界十大嘅奇怪景點，最近嗰個就只係隔咗一個海嘅台灣咋。想要有特別嘅體驗，就不妨mark實下列10個地方喇，當中有啲仲充滿歷史同傳奇故事！
1. 捷克 人骨教堂（Sedlec Ossuary）
淨係睇外表，你會覺得只係一間普通教堂，但當你一行入去，一定會被眼前嘅景象嚇親！建於 15 世紀嘅人骨教堂，裡面竟然包含咗 4 萬人嘅骨骸！捷克嘅木匠將骸骨融入教堂嘅設計，將佢地化身成吊燈、門廊等唔同嘅裝飾品，真係鬼斧神工得嚟，同時又帶住陣陣寒意……
2. 土耳其 頭髮博物館（Avanos Hair Museum）
呢座博物館建於 1979 年，起源係一位陶匠被迫同女友分手，佢叫女友留低一樣物件作為紀念，女友就剪低咗一撮頭髮畀佢。陶匠將呢撮頭髮擺喺自己嘅鋪頭，仲同經過嘅遊客訴說自己嘅愛情故事，亦因為咁好多女遊客都深深被打動，甚至剪低自己嘅頭髮交畀店主。呢個洞穴狀嘅頭髮博物館，至今藏有超過16000截頭髮樣本！
3.冰島 陰莖博物館（Icelandic Phallological Museum）
冰島唔止有令人歎為觀止嘅天然風景，原來連人整出嚟嘅隨時都令你睇到嘩嘩聲！呢個博物館就放置咗超個200種動物嘅雄性陰莖或者係佢嘅相連部位，當中有鯨魚、北極熊、海豹，甚至人嘅陰莖，啱晒一啲想進修「生物知識」嘅朋友。
4. 泰國 人妖文化（Ladyboys）
泰國最著名嘅除咗陽光與海灘之外，其實仲有多姿多彩嘅夜生活同埋為數不少嘅變性人。當地人會稱呼佢哋做Katoeys，而呢種文化亦已經普遍被接受。呢班美艷嘅「小姐」通常會喺曼谷嘅紅燈區度行走，為有需要嘅旅客提供特別嘅服務，令你有更「難忘」嘅旅程。
5. 美國 粟米皇宮（Corn Palace）
呢座於1892 年正式開放嘅玉米皇宮位於美國嘅南達科他州，原本係當地農民想要展現豐收嘅成果，時至今日，整座建築都仲係同粟米離唔開關係。內部介紹關於種植粟米嘅歷史同知識，外部就有由粟米唔同部份整成嘅裝飾牆，充滿農家風情。
6. 美國 香口膠牆（Bubblegum Alley）
下次當你嚼完一舊香口膠，唔洗心急將佢包起扔去垃圾桶，因為你可以去美國加州嘅一幅香口膠牆黐起佢留為紀念！呢幅大名鼎鼎、滿佈嚼過嘅香口膠牆嘅歷史可以追溯到1960年代，由來自全世界唔同地方嘅人「合力」，逐漸將佢變成一幅藝術作品。不過對於有潔癖嘅人嚟講，呢個地方應該恐怖過地獄……
7. 台灣 玻璃鞋教堂（Glass Slipper Church）
呢間造型咁特別、高約17 公尺嘅玻璃鞋教堂位於台中嘅嘉義，吸引唔少當地人同外國旅客嚟呢度影婚紗相同辦理婚禮，最啱滿足每個女仔心裡面想由灰姑娘搖身一變成為公主嘅幻想。
8. 泰國 地獄公園（Wang Saen Suk Hell Garden）
如果你好奇想知道地獄裡面會發生啲咩，最好就嚟泰國呢個地獄公園。門口一個「歡迎來臨地獄」嘅指示牌，代表你已經進入地獄嘅領域，感受緊佛教中描繪嘅地獄畫面。而展示嘅每種酷刑旁邊都有註明佢哋犯下嘅罪行，提醒住遊人要醒醒定定做人。
9. 墨西哥 娃娃島（Island of the Dolls）
當地一名男子因為發現咗一具飄浮嘅年輕女孩屍體同佢身邊嘅公仔玩具，自此夜晚就成日聽到有女仔喺佢耳邊講嘢。所以喺50年裡面，佢不斷將唔同嘅公仔掛滿整個島，希望安撫女仔嘅靈魂，但最詭異嘅係最後呢名男子都喺同一條運河度淹死……
10. 澳洲 大便便（Big Poo）
便便唔單止存在喺廁所，仲有喺澳洲嘅Kiama 小鎮裡面。呢舊高約16公尺嘅「大便」原來係因為一次有關污水系統嘅抗議而整成，每年吸引數以千計嘅遊客嚟專程睇呢條「大便」，真係令人意想不到。
（圖片來源：tumblr、The Talko）
