到底睇AV會唔會影響現實中情侶或夫妻之間嘅關係？相信呢條問題喺男同女心目中都有住唔同嘅答案。女性對於男人睇AV總係感覺比較負面，覺得佢哋嘅幻想不切實際；又覺得男人需要睇AV即係代表自己吸引力唔夠，男人唔夠滿足；甚至有人會覺得現實中無伴侶、陣係可以睇AV洩慾嘅男人，AV中離地嘅情節會令佢哋增加施暴嘅可能。

美國專欄作家Maria Konnikova日前喺Aeon.com上發表嘅一篇文章就指出，唔同嘅研究結果顯示其實呢啲講法唔係全部成立。

丹麥犯罪學家Berl Kutchinsky就研究咗3個國家嘅數據，當中包括丹麥、西德同瑞典，佢哋都有個共通點，就係成人影片產業係合法嘅。成人影片產業合法化之後嘅20年，性犯罪率反而比之前降低咗，或者就係因為AV將兩性曾經有過嘅性幻想付諸畫面。

加州大學洛杉磯分校與愛達荷州立大學喺2013年就做咗一個研究，分別畀44對情侶一齊或分開睇AV，然後再回答一啲問題。結果發現睇AV不但無令佢哋覺得對方吸引力降低，反而會更加想同對方有親密接觸。

夏威夷大學嘅研究結果亦指成人影片並唔會改變觀眾對女性的態度；不過荷蘭一個研究指出，AV就似其他好多因素一樣，的確會對人們嘅性行為產生影響。

咁到底點解我哋一直以嚟普遍都覺得AV係負面嘅呢？心理學家就指睇AV並唔係問題出現嘅起因，而只係出現問題嘅徵狀。例如係伴侶間喺感情或者性生活上出現問題，就會睇多咗AV，相反如果係兩個人感情好好，對AV嘅需求就會減低。

所以與其怪AV影響兩個人之間嘅感情，不如好好揾出點解對方成日睇AV嘅原因仲好啦。有時兩性關係嘅嘢係雙向嘅，怪責對方嘅同時都要反省吓自己有無問題，咁先係解決問題嘅方法。

（圖片來源：tumblr）