即使係自認開明嘅女人，當講到理想對象嘅時候，第一個條件可能都係要高過自己，絕對唔會同矮過自己嘅人拍拖。

一個英國喺2012年做既研究顯示，92.5%嘅異性伴侶中都係男人高過女人嘅。而美國疾病控制與預防中心嘅統計則指出，男女身高平均相差5.5吋。根據2008年嘅一個研究顯示，受訪嘅大學生當中有50%嘅男性希望另一半矮過自己，而90%嘅女性都想伴侶比自己高，反映男女對伴侶身高都有一定嘅要求。

但又唔使咁驚嘅，其實同一個矮過自己嘅男人拍拖，反而會帶嚟以下7個你估計唔到嘅好處！睇埋先決定SAY唔SAY NO啦，可能到時你已經會改變主意！

1. 更能接受女性的嘅目標、理想及才華

如果一個男人唔介意伴侶高過自己，咁相對地都會傾向唔介意女性發展自己嘅事業同追求自己嘅理想，唔會用刻板嘅女性形象局限住你。佢亦會比其他人更尊重你嘅意見，唔會係面子大過天嘅大男人。

2. 唔需要計住要著幾高嘅高踭鞋

如果同高過自己嘅男人拍拖，好多時都要計住度住高踭鞋嘅高度，怕著咗之後自己會高過對方。但同矮男拍拖就唔會有呢個煩惱喇，因為……未著鞋之前已經高過佢，所以要著嘅話，著幾高都唔再係禁忌啦。

3. 選擇更多

揾一個無論喺情感、價值觀、仲有性愛上都同自己夾得嚟嘅人已經好難，如果仲要設定一個身高嘅界限，選擇只會更加少。問吓自己到底揾一個真正同自己合得嚟嘅人、彼此相愛重要啲，定係追求身高上嘅差距更重要？記住人嘅外在都會隨著年月改變，唯有內心先有可能一直保持。

4. 令你擺脫對自己身形、體重嘅不安

因為本身嘅身形上已經有所謂外界眼中嘅缺陷，所以當你決定唔理出面嘅人點睇嘅時候，同時對自己體重、身形要求嘅不安同壓力都會消失。其實當兩個人一齊時開開心心、互相倚靠，而且無論喺外表定內心上都覺得對方有吸引力嘅時候，仲需要理會其他人點睇咩？

5. 願意做更多嘅家務

根據美國全國經濟研究所喺2014年做嘅研究顯示，矮男平均每星期會做8小時28分鐘，亦即係百分之28嘅家務，而高男就只會做大約7小時30分嘅家務。雖然男性做家務嘅比例最高都只係28%……但多啲總好過少啲吖。

6. 揾錢多啲

同樣嘅研究顯示78%矮男揾錢比另一半高，比起一般身高嘅69%，以及高男嘅71%相比，比例上都高出唔少。咁樣反映矮男無論喺家務定係財政上，通常都比到伴侶更多嘅支持。即使身材矮細，都可以係令你好有安全感嘅後盾！

7. 離婚機會最低

研究結果亦顯示，矮男嘅離婚率相比起高佻同一般身高嘅男士低出32%，數據上嘅差異好大，反映出矮男唔止係財政、家事比其他男人優勝，就連感情上都特別專一！

（圖片來源：tumblr）