去旅行最驚就係航班突然被取消，除咗會搞到行程大失預算之外，更加會令你需要喺機場呆等幾個鐘... 如果不幸遇上咁嘅狀況應該點應對先好？或者你就可以參考以下4個建議，冷靜解決呢個突發危機。
1. 立即致電航空公司，詢問有關更改航班詳情
航班突然被取消，第一時間需要做嘅就係致電航空公司了解詳情，同時要求更改航班。越早致電航空公司，就越容易成功轉換到較佳位置，因此記得每次出發之前都要了解航班最新資訊。
2. 如果航班因機件故障延誤，或會獲得航空公司住宿津貼
如果航班係因為天氣問題延誤，航空公司係唔會比任何津貼大家。但相反如果係因機件故障而延誤航班，航空公司一般都會向受影響旅客發放餐飲或住宿津貼。此外記得獲得住宿津貼之後，無論Check-in或者預約翌日接駁機場巴士嘅時候，都要儘早確認，避免同同一航班或其他旅客爭崩頭。
3. 寄倉行李延誤，記得領取旅行套装
行李寄倉後先知道航班延誤，你嘅行李就有機會獲重新編配由其他客機運送，無辦法喺你land嘅時候同時抵達。所以假如你遇上呢類情況，記得就要去相關航空公司嘅行李寄存櫃台，向對方領取旅行套装。一般嚟講，旅行套装都會有牙刷、牙膏、眼罩等。
4. 禮貌對待航空公司職員
雖然都知道航班延誤會令人急燥，但請大家切記唔好對地勤及空中服務員無禮，因為佢地都只不過係想盡力服務大家嘅前線人員，以及航空公司都只不過係為咗大家安全先會延誤航班。所以一旦遇上航班延誤，大家都要記得要冷靜對待，先可以解決到眼前嘅問題。
封面圖片：favim
圖片來源：Tumblr
