香港人鐘意去旅行，相信應該都搭過唔少次飛機。但係喺經常搭飛機嘅同時，你地又有冇曾經發現自己對飛機升降都有少少疑問，例如諗唔明點解降落嘅時候會閂燈咁呢？今日我地就會為你一一拆解！
1. 飛機上面無一個位置係特別安全
聽到有關空難嘅新聞，好多人都會潛意識地諗下究竟飛機上面有冇一個特別位置，可以令人喺發生意外時增加自己存活率。但根據美國聯邦航空總署報告，飛機上面其實係無一個特定位置係較為安全，例如喺飛機第三節坐最尾就有32%死亡率、坐第三節中段就係39%、最頭就係38%，所以基本上分別都唔係太大。另外其實綜觀嚟睇，飛機墜毀嘅機會都係相當罕見。
2. 飛機唔需要兩個引擎先飛到
雖然利用一半嘅引擎動力，飛機就會消耗更多燃料及無得無咁遠，但其實一般嘅商用客機都係能夠以一個引擎安全飛行，應付特殊情況。而喺美國聯邦航空總署規定之下，任何會飛過5大洋，或者無人居住地方如北極嘅航班都係需要測試過單引擎飛行大約330分鐘，即5個半小時先可以航行，所以對於發生緊急狀況之下，一個引擎都絕對應付得到。
更甚嘅係就算兩個引擎都失去動力，飛機都可以憑著特別考慮過嘅滑翔方式降落，例如波音747就可以每1000尺滑翔兩里，足夠令機上乘客安全返回地面。
3. 閂燈降落係為左令眼睛適應
飛機晚上降落點解會閂燈？原來係因為假若降落時發生意外，唔閂燈就會令乘客眼睛就非常難以適應外面漆黑一片嘅環境，從而造成逃生困難。情況就好似有人叫你入一間本身好光嘅房之後，突然閂燈叫你立即避過障礙物逃走一樣。此外空中服務員之所以會要求乘客打開窗簾，同樣都係為左預防緊急狀況，令飛機有事發生都可以即時判別到應該用邊一邊疏散乘客，減低傷亡。
4. 雷擊等於食生菜
現代飛機嘅設計其實早已經考慮到雷擊嘅問題，所以如果飛機被雷電擊中，電流就會隨住飛機精密設計流走，因此飛機就唔會失去動力墜毀或者受到損毀。此外根據統計，每一架飛機每年每1000飛行小時就會被雷電擊中一次，所以情況係非常常見的。
5. 部分飛機係設有機員專用睡房
（圖片來源：Core77）
長途機對於搭客嚟講已經相當辛苦，何況係要喺長達16小時中不斷為大家服務嘅空姐同空少呢？所以部分飛機例如波音777、787，佢地都會備有細小，大約有6至10張床嘅機員專用睡房，等空中服務員可以輪班休息。
6. 飛機車胎唔會爆
（圖片來源：Giphy）
飛機車胎同我地一般私家車嘅唔同，係能夠承受38噸重量，以及可以承受500次每小時170里時速嘅撞擊先至需要更換。此外，飛機輪胎更加係膨漲到200PSI，比私家車車胎嘅氣壓多6倍的！
7. 廁所煙灰缸係為安全而設
（圖片來源：standalone-sysadmin）
雖然飛機已經完全禁止乘客食煙，但因為考慮到有乘客會唔聽話繼續食煙，廁所裡面個煙灰缸就能夠比呢啲唔守規矩嘅人好好放置佢地嘅煙頭，避免佢地因為無位放而放入垃圾桶而引起火災。
