咁難得先約到自己嘅女神出街，男士們應該都會好在意對方會點睇自己，自己有冇做出任何失禮嘅事情。對於女神喺第一次約會時腦海所閃過嘅疑問，你地又有冇了解過佢地會點諗，當中會牽涉關於你嘅邊幾個方面呢？

1. 你地兩個嘅小朋友會係乜野樣？

同你單對單共度時光嘅時候，女仔都會幻想下如果將來真係同你喺埋一齊嘅時候，你地兩個嘅小朋友究竟會係乜野樣。究竟佢係會似你多啲，定抑或係女仔自己多啲呢？呢種種嘅問題都會喺第一次約會嘅時候出現。

2. 你之前嘅女朋友係邊個？

因為想了解下你嘅過去，以及自己點解會成為你嘅對象，女仔對於你嘅前度其實都係相當好奇，更有機會翻開你整個社交網絡睇下有冇你前女友嘅蛛絲馬跡。除此以外佢地顯得咁好奇，其實亦有機會係擔心你之前點對待另一半，或者會唔會係一腳踏兩船。

3. 食定唔食好？


（圖片來源：Giphy）

第一次同男仔出街，食得多又驚會嚇親人，就住嚟食又會餓親自己。所以對於佢地嚟講，食抑或唔食真係一個哲學問題，好難解決得到。

4. 你會點對待侍應？

從一個人點樣對待一位陌生人，其實就能夠睇穿佢本質上係一個點嘅人，會唔會係心地唔好兼好無禮貌嘅偽君子。如果佢連陌生人都可以對待得咁無禮貌，即係佢同熟人一齊就會更加放肆，係女仔嘅應該都會再三考慮係唔係要同個咁嘅人一齊。

5. 你同佢前度比較，邊個好啲？

你外型似唔似佢嘅前度？習慣、喜好有冇共通點？女士一般都會將你同前度比較，睇下你會唔會好過之前嗰個。就算唔係好過之前嗰個，最起碼都要評估下你會唔會好似前度咁將佢拋棄。

6. 你有冇自信？

自信能夠為任何人增加魅力，所以如果你喺首次約會嘅時候就已經自信滿滿，你獲得加分嘅機會都會高啲。但記得自信過頭就會顯得你非常扮野，所以記得要同時表現謙卑。

7. 自己會唔會講太多野？

初次單對單約會，女士都會把握機會想了解你，但同一時間都會好在意自己會唔會問得太多野，冒犯左你之餘仲顯得自己好八卦咁。所以要滿足自己對你嘅好奇心，以及同時抑壓想繼續發問嘅感覺真係絕不容易！

8. 對你嘅認知係唔係由FB偷睇番嚟？

如果佢一直都對你有好感，真正面對你嘅時候，佢就會懷疑自己對你嘅認知以及各種資訊，究竟係唔係佢自己從Facebook跟蹤你嘅時候偷睇番嚟。如果無諗清楚就講左出嚟，咁就好容易比你地知道左佢地係跟蹤狂，怕咁會令你驚左佢。

9. 會唔會你望得佢太多

無錯同人講野應該要有眼神接觸，但過分嘅眼神接觸又會顯得非常古怪，好似有少少唔正常咁。所以如果你成日都望實對方對眼講野，令到佢好唔舒服嘅話，咁就會弄巧反拙，搞到人地怕左你。

10. 餐飯邊個找數？

同男仔出街食飯，一般女仔其中一樣最關心嘅就係邊個比錢。由於好多人都會覺得第一餐應該由男方比，所以你主動請客嘅話女仔多數都會覺得你幾有風度同禮貌。但當然，你都要睇番女方性格係點先啦.. 或者佢係唔介意AA制架嘛！