兩性身體構造唔一樣，呢一點大家都知道，但你又知唔知道比較起兩性嘅生理時鐘，女性需要嘅睡眠時間原來係比男性多架呢？！
根據拉夫堡大學Jim Horne教授研究，女性之所以需要更多嘅睡眠時間，全因佢地嘅腦部較為複雜，需要利用睡眠嚟減低壓力以及其他負面情緒。亦因為呢個原因，女性如果唔夠瞓嘅話，佢地就會更容易出現心理困擾嘅情況，令佢地更易動怒、唔開心以及激動，同失眠男士嘅反應並唔一樣。所以對比起一般人只需要瞓7個鐘頭，女士就有機會需要瞓多少少時間，減低受到嘅壓力。
▼女孩子原來比男孩子係需要瞓多啲架！
（圖片來源：asntown）
咁究竟從生理角度嚟講，黠解女人會需要更長嘅睡眠時間呢？Jim Horne教授解釋，因為相比起男人，女士係較常會一心多用，所以腦部就會受到更大壓力，需要更多時間休息修復。而喺睡眠嘅時候，負責控制記憶、語言能力等嘅腦皮層就會獲得修復，等人可以喺瞓醒之後如常運作。總括而言按著每個人嘅情況而定，女性因此就需要多最少20分鐘嘅睡眠時間。
喺同一道理之下，Jim Horne教授亦都補充如果男士職位涉及大量決策工作，佢地都會因為思考過度而需要瞓多少少。
所以如果姊妹你經常都昏昏欲睡嘅話，你就知道呢個並唔係你懶惰，而係你嘅腦部真係好需要休息喇！
封面圖片：Pinterest
