去旅行會玩到個心散哂，令人重返工作崗位之後唔可以專心工作？或者講得出呢句野嘅野，其實本身佢自己都未曾真正享受過旅行生活，而且更加係未認真放低過自己嘅工作壓力！因為根據美國最近一項研究，原來工作間忙裡偷閒，間中放下假去旅行玩下，其實反而係更能提升工作效率。

因為曾經喺聯絡歐洲行政人員時常常摸門釘，被知會對方放緊假，美國一家顧問公司於是就進行左一項研究，睇下究竟請假去旅行係唔係真係能夠提升行政人員嘅工作效率。

▼去旅行會玩到個心散哂，定係會提升工作效率？美國呢個研究就表示為後者居多。

結果喺邀請左2310名，分別來自20個擁有最多有薪假期嘅國家嘅打工仔之後，首先佢地就發現瑞典同巴西都擁有較多嘅有薪年假，全年就有成41日咁多。而相比起呢兩個國家，分別只有28及10天年假嘅澳洲同美國就真係差天共地喇！（原來美國同香港情況都差唔多呢...）

而為左研究旅行同工作效率提升有冇直接關係，顧問公司於是就首先要求接受研究者完成測試，睇下佢地喜歡做野嘅節奏係快定係慢，然後再憑佢地完成嘅工作，分析工作品質及佢地忍耐能力。

喺完成研究之後，顧問公司發現放得較多有薪假期嘅國家無論喺工作速度、品質及員工忍耐能力方面，評分都比較低嘅表現更勝一籌。而且當問到佢地會唔會太多工作，或者佢有冇能力有效咁編配自己工作嘅時候，擁有較多有薪假期嘅人通常都能夠以肯定嘅答案回答。相反，擁有較少嘅則會對回答問題顯得非常卻步。

雖然結果顯示出擁有較多有薪假期嘅歐洲員工效率超卓，但研究同時亦都發現佢地所承受嘅壓力其實反而比其他地方較大，因為佢地假期實在太多，工作時間太少，需要儘快以高效率處理工作先至係上策，拖拖拉拉就只會令工作無法喺限時之內做好。

所以研究最終就發現，擁有較多年假嘅人其實真係會較為有效率，因為佢地工作時間實在太少，放假時間實在太多喇！香港人，唔知你地會唔會因此而羨慕呢？