鍾意玩Snapchat嘅後生仔，一定要買佢哋最新出嘅鬼馬眼鏡，可以影到10秒短片同影相。個款潮唔潮就自己諗，擁有副眼鏡呢件事本身先最潮，所以美國有得買嘅地方都出現排隊搶購潮。
▼要喺呢部Snapbot先買到眼鏡。
最搞鬼副眼鏡唔係喺商店上架發售，而係整咗部激似Minions迷你兵團嘅自動販賣機Snapbot嚟賣，每日喺唔同地方快閃出現。眼鏡暫時有3隻色：黑、粉藍、紅，撳機上對應嘅顏色再碌機就買到，每副賣US$129，約HK$1,000。
香港依家仲未有得買，想快人一步梗係上網買啦，不過炒價都幾癲吓，平均炒到HK$7,000左右。
(圖片來源：Snapchat)
