2012年Canon EOS M系列面世時，主打輕巧體積細，機身都幾齋吓，功能同機能亦唔算勁，慢慢一代代越加越多嘢。今日上市嘅全新M5 (淨機價HK$7,880) 仲誇張，單睇外表同傳統單鏡反光機有9成似，重量亦由上代約300g跳升至380g。
重量或者係缺點，但佢個實力亦不容置疑，事關佢終於擺脫二奶命，繼承多項單反技術，例如Canon單反已用咗幾年嘅「雙像素CMOS自動對焦」(Dual Pixel CMOS AF)，加快對焦速度；配合全新DIGIC 7數碼影像處理器，連拍速度大升近1倍至每秒9張，開機速度亦快至1秒。
今代M5仲加咗新功能「Touch and Drag AF」，就係用觀景器嘅同時，可以喺篤個芒對焦，不過小編唔明呢種係咩玩法，除非唔用左手托住鏡頭，否則單靠拇指又點會夠長？
▼觸控熒幕同觀景器可以同時用。
▼螢幕可以向下翻開180度。
(圖片來源：Canon)
